Sentru Matan Nasionál falta rekursu umanu hodi atende pasiente sira
DILI, 10 outubru 2024 (TATOLI) – Xefe Departamentu Matan iha Hospitál Nasionál Guido Valadares (HNGV), Valerio Andrade, rekoñese Sentru Matan Nasionál nafatin falta rekursu umanus hodi atende ba pasiente matan sira.
“Ita nafatin menus rekursu umanu iha Sentru Nasionál Matan, tanba ita-nia espesialista matan foin mak na’in-lima, husi timoroan sira iha na’in-tolu mak sei konitnua estudu iha rai liur”, Valerio Andrade dehan ba jornalista sira iha Palásiu Nobre Lahane, ohin.
Nia informa, estimasaun ne’ebé mak iha katak presiza tan profisionál saúde matan na’in-hitu, atu bele kobre ospitál referál sira no sentru saúde sira ne’ebé mak iha populasaun barak, tanba haree katak probelma matan daudaun ne’e aumenta barak.
“Iha Sentru Nasionál Matan, loron ida ita rejistu kada fulan rihun ida-resin mak ho problema matan, liuliu halo operasaun ba kararata no diabetik retinopathy, inklui trauma iha matan sira hanesan ema sira servisu, maibé la proteje matan”, nia esplika.
Nia afirma, husi janeiru to’o setembru, pasiente ne’ebé mak ho problema matan mai halo tratamentu saúde iha Sentru Nasionál Matan hamutuk rihun sia-resin no husi ne’e halo transferénsia ba rai liur hamutuk 15.
“Pasiente ho problema matan 10 mak sei pending hela, seidauk haruka ba rai liur hanesan Malázia no Singapura tanba ospitál iha rai liur ita seidauk selu dívidas, entaun ita-nia pasiente sira nafatin iha ne’e seidauk ba halo tratamentu matan”, nia relata.
Nia salienta, Governu transfere pasiente matan ba halo traramentu iha rai liur, tanba ekipamentu ba diabetik retinopathy ne’e la iha.
“Kazu sira ne’ebé mak mak maioria ita halo transferénsia ba rai liur maioria diabetik retinopathy, tanba ita la iha ekipamentu ne’ebé sufistiku ka espesifiku ba ida-ne’e, agora ita buka meius hela tau orsamentu Estadu ba 2025, entaun ami hatama ona proposta ba HNGV, espera iha tinan oin bele responde, nune’e ita bele hamenus transferénsia ba rai liur”, nia hatutan.
Iha fatin hanesan, Reprezentante Prezidente Repúblika, Jesuina Maria Ferreira Gomes, hateten Governu halo esforsu hodi aloka Orsamentu Jerál Estadu 2025, rekursu finanseiru nesesariu atu implementa ba planu estratéjiku saúde matan nian
“Saúde matan mak ema hotu nia direitu nu’udar nasaun atu responsabiliza atu garante sidadaun hotu atu asesu saúde matan nian ho kualidade tanba ne’e 2025 ita bele hahú esforsu hodi aloka Orsamentu Jerál Estadu 2025, rekursu finaseiru nesesáriu atu implementa planu estratéjiku saúde matan nian”, Jesuina Maria konklui.
Jornalista : Felicidade Ximenes
Editór : Zezito Silva
