BOBONARO, 11 outubru 2024 (TATOLI)-Abitante sira iha aldeia Raifun Foho, suku Raifun, postu administrativu Maliana, munisípiu Bobonaro durante tinan 20 resin ona to’o agora sei kontinua hela iha nakukun laran tanba seidauk asesu enerjia elétrika.
Komunidade Aldeia Raifun Foho, Armando Mali Talo, senti triste tanba desde Timor-Leste ukun-an to’o agora sei kontuinua sunu lampariña, kamí no solar painel ka ‘Tenaga Surya’.
Notísia relevante: EDTL fornese ona enerjia elétrika ba uma-kain 1,676 iha Bobonaro
“Agora loron hanesan ne’e kontente tanba Tanga Surya maka’as, udan mai ona ne’e kalohan taka ahi mate ona, entaun ami toba iha nakukun de’it, dalaruma sunu lilin, ami senti araska, labarik sira atu estuda mos la diak, estuda mos tur iha nakukun deit,” nia esplika.
Nia rekomenda ba governu atu aselera prosesu instalasaun enerjia eletrifikaksaun, tanba aldeia viziñu hanesan Maganutu, suku Ritabou, aldeia Anahun, suku Odomau asesu hotu ona naroman husi Eletrisidade Timor-Leste,Empreza Públika (EDTL).
“Ema hotu-hotu nia ahi tama ona ona, agora nusa mak aldeia Raifun la tama ne’e, ami hakarak ahi bele tama lalais ba hodi hetan naroman oituan,” nia katak.
Komunidade, Elsa Sose Mau, reforsa durante ne’e komunidade ne’ebé iha kapasidade ekonomía natoon bele sosa solar panel, maibé ba sira ne’ebé laiha kbiit, obrigatóriu sunu kamí hodi haroman uma-laran iha tempu kalan.
“Ami osan laiha ne’e ba hili kamí, baku tiha fai, depois tau ho kabaas, lae tau ailele-funan depois to’o kalan halo lakan,” nia haktuir.
Sose Mau argumenta, problema ne’e afeta maka’as ba estudante no komunidade atu akompaña informasaun rai-laran no rai-liur ne’ebé públika iha plataforma dijiitál no televizaun.
Xefe aldeia Raifun Foho, Raimero Bere Biti, dejan, iha tinan hirak liubá no iha 2023 ne’e ekipa tékniku EDTL,EP munisípiu Bobonaro halo ona levantementu dadus, maibé to’o agora laiha rezultádu.
“Ha’u ho ha’u-nia komunidade hein deit, mas la hatene bainhira loos,” nia katak.
Tuir dadus monografia suku Raifun, aldeia Raifun foho iha totál uma-kain 64 ho nia totál populasaun 200-resin.
Notísia relevante: Uma-ka’in 6.196 iha Bobonaro seidauk asesu eletrisidade
Jornalista: Sérgio da Cruz
Edítór: Evaristo Soares Martins
