DILI, 11 outubru 2024 (TATOLI) – Ró Kruzeiru Le Jacques Cartier husi Austrália atraka iha Portu Dili ohin, maizumenus tuku 7:00 dadeer, tula turista hamutuk atus ida resin vizita Timor-Leste (TL).
Diretora Nasionál Marketing no Relasaun Internasionál husi Ministériu Turizmu no Ambiente, Ivania Gonçalves, relata turista sira ne’e mai husi nasaun Austrália, Dinamarka, Fransa, Japaun, Singapura, Indonézia, Filipina no Estadus Unidus Amérika hodi pasa sira nia férias no vizita monumentu no muzeu istóriku balun ne’ebé iha relasaun ho Timor-Leste nia independénsia.
“Kruzeiru ne’e mai husi Austrália ho turista 130 no tripulante 131, ne’ebé nia objetivu atu pasa ferias no vizita fatin istóriku no turístiku balun iha nasaun ne’e”, Ivania informa ba Tatoli, iha Portu Dili, ohin.
Diretora ne’e mós haktuir katak kruzeiru ne’e sei mantein iha portu Dili to’o tuku 8 kalan hafoin sei kontinua nia vizita ba tasi-ibun Uatabo, Munisípiu Baucau, molok fila hikas ba Austrália.
Tuir ajenda, durante loron ida iha Díli, turista sira sei vizita Arkivu Muzeu Rezisténsia Timor-Leste, Sentru Nasionál Chega, Semitériu Santa Cruz no Cristo Rei, inklui esplora tasi-ibun furak sira Uatabo nian, iha Baucau.
Jornalista : Felicidade Ximenes
Editór : Zezito Silva
