PN konsidera media pilár importante iha demokrasia
DILI, 11 outubru 2024 (TATOLI)-Membru Parlamentu Nasionál (PN), liuhusi Deputadu bankada CNRT, Natalino dos Santos, kondisera media nu’udar pilár importante iha demokrásia.
Notísia relevante:https://tatoli.tl/2022/05/24/pn-aprova-16-outubru-sai-loron-nasional-liberdade-imprensa/
“Liberdade imprensa ne’e buat ida importante, tanba Estadu ne’e opta tiha ona Estadu direitu demokrátiku, no demokrasia la’o bainhira fó liberdade ba ema hotu expresa, la’ós de’it jornalista no media de’it, maibé ema hotu-hotu iha direitu atu halo espresaun ne’e esénsia husi demokrásia mak ida-ne’e,’’ Deputadu Natalino dos Santos, hateten ba jornalista sira iha resintu Parlamentu Nasionál, sesta ne’e, relasiona ho komemorasaun loron nasionál Liberdade Imprensa ne’ebé Timor-Leste sei komemora iha 16 outubru ne’e.
Tanba ne’e, membru PN ne’e hakarak kongratula media no jornalista sira ba komemorasaun loron nasionál liberdade imprensa ne’ebé sei komemora iha semana oin.
Nia apresia serbisu jornalista hotu husi instutisaun media eletrónika, jornál, online ho sira seluk, tanba rekoñese media nu’udar komponente importante iha Estadu ida ne’e, ne’ebé nu’udar fonte komunikasaun bele liga povu nia lian no halerik mai polítiku sira, no mós bele transmite PN nia hanoin no informasaun tuun liga ba povu sira, tanba ne’e media elementu ida importante save ba demokrasia.
“Hakarak husu ba ita-bo’ot sira, divulga informasaun ruma tenke halo konfrontasaun entre informasaun a ho b, depois foti konkluzaun hodi imi-nia informasaun sira sai ba ne’e kredível, responsavilidade, hodi ema labele krítika imi, labele fó sala fali imi, tanba ne’e enkoraza nafatin imi nia serbisu,’’nia enkoraza
Deputadu FRETILIN, Antoninho Bianco, kontinua dezafia jornalista no media sira atu kontinua fó informasaun ne’ebé loos, no kontinua sai aspirasaun ba povu nia lian.
Enkuantu, PN iha 24 Maiu 2022, aprova projetu rezolusaun PN númeru 95/V(4a)-institui loron Nasionál Liberdade Imprensa iha 16 Outubru, nune’e kada tinan bele selebra.
Jornalista: Nelson de Sousa
Editór: Rafael Ximenes de A. Belo
