PNTL Viqueque preparadu asegura seguransa iha loron finadu

VIQUEQUE, 11 outubru 2024 (TATOLI)- Komandante Polísia Nasionál Timor Leste (PNTL) Munisípiu Viqueque, Superintendente António Rego Fernandes, dehan PNTL munisípiu Viqueque hahú halo preparasaun hodi asegura seguransa iha loron finadu, ne’ebé sei akontese iha 2 Novembru 2024.

“Ba loron finadu hela semana tolu ne’ebé ami agora  hahú  faze preparasaun, ami mós halibur arte marsial ativa sira iha munisípiu Viqueque. Tanba ita iha pasadu problema sempre mosu iha loron finadu. Tan ne’e, ha’u konvida organizasaun sira hodi koordena ba malu atu hamutuk fó garante seguransa iha loron finadu, nune’e ita-nia inan aman sira  livre ba semitériu”, Komandante PNTL Viqueque ne’e, hateten ba jornalista sira hafoin ramata enkontru ho Federasaun Silat Timor Leste (FSTIL), iha salaun Parokia Viqueque Vila, ohin.

PNTL  Viqueque mós sei destaka membru PNTL sira iha semitériu sira hodi asegura situasaun, durante loron finandu.

Nune’e  Komandante ne’e husu ba komunidade munisípiu Viqueque nafatin kolabora parte autoridade seguransa hodi asegura loron finadu no bandu komunidade sira lori tua barak ba semitériu tanba bele hamosu problema.

Iha fatin hanesan, Prezidente  FSTIL, Carlos, haktuir FSTIL koopera ho PNTL hodi organizasaun arte marsial ne’ebé hamahon an iha FSTL  hodi asegura seguransa iha loron finadu iha munisípiu Viqueque.

“Ami bele organiza organizasaun hotu-hotu hodi kontribui ba PNTL asegura estabilidade.  Maibé ami nafatin iha komitementu kontribui ba establidade iha munisípiu Viqueque. Ami mós husu agradese ba PNTL bele envolve ami iha seguransa nu’udar ajente ida ba seguransa”, nia sujere.

Enkuantu, organizasaun sira-ne’ebé hamahon an iha FSTIL maka hanesan Persaia Diri (PD), Pajajaran no organizasan tolu ne’ebé Gorvernu fó suspensaun hanesan PHST, IKS no KORK.

Entrentantu, sorumutu ne’e lidera husi komadante PNTL munisípiu Viqueque, lider organizasaun sira, estudante,sub Komisaun reguladór Arte Marsiais (KRAM).

Jornalista  :  Vitorino Lopes da Costa

Editór        :  Florencio Miranda Ximenes