Tempu besik, Autoridade Viqueque apoia komputadór no mákina imprime ba suku 36
VIQUEQUE, 11 outubru 2024 (TATOLI)- Diretór Serbisu Apoiu Organizasaun Munisípiu Viqueque, Cosme Sarmento, dehan autoridade prepara ona ekipamentu hanesan komputadór no mákina imprime ba suku 36 hodi fasilita serbisu funsionáriu apoia suku.
“Ekipamentu limitadu hodi fasilita funsionáriu sira atu halo serbisu hodi atende komunidade sira iha suku. Nune’e, ita prepara ekipamentu ho pakote ida kompostu husi komputadór no mákina imprime ba suku sira hodi reforsa serbisu”, Diretór Comes Sarmento, hateten ba Agência Tatoli, iha Postu Viqueque Vila, ohin.
Fasilidade sira-ne’e daudaun ne’e iha ona administrasaun munisípiu Viqueque hein atu distribui ba kada suku sira iha munisípiu Viqueque.
“Tuir planu tersa semana oin maka ami sei ofisializa distribui ekipamentu sira-ne’e ba autoridade suku sira ne’ebé eziste iha munisípiu Viqueque. Ami fiar katak ho ekipamentu sira-ne’e sei reforsa serbisu suku sira”, nia afirma.
Molok ne’e, VIII Governu Konstituisionál distribui ona ekipamentu komputadór no mákina imprime ba suku sira, maibé destaka tan funsionáriu na’in-haat, nune’e ekipamentu sai difikuldade ba sira.
Iha fatin ketak, Xefe Suku Ossu de Cima, Postu Ossu, Celestino Carvalho, haktuir autoridade suku simu ona informasaun kona-ba ekipamentu komputadór no mákina imprime ba suku, maibé ida-ne’e seidauk sufisiente ba funsionáriu sira iha suku.
“Agora, ami laiha komputadór, iha mandatu VIII Governu ami simu, maibé komputadór aat to’o agora ami laiha komputadór ne’ebé funsionáriu priense iha formatu de’it”. nia hato’o.
Jornalista : Vitorino Lopes da Costa
Editór : Florencio Miranda Ximenes
