DILI, 12 outubru 2024 (TATOLI)—Membru FALINTIL-Forsa Defeza Timor-Leste (F-FDTL), Koronel Antonio Soares da Silva ‘Maucalo’ hakotu iis iha sábadu dadeer, tuku 07:00, hafoin halo tratamentu saúde iha ospitál Malázia.
“Ohin dadeer ami simu kontaktu via telefone, ami rona dehan nia (matebian) dadeer ne’e hakotu iis tanba nia moras, ne’ebé sofre moras komplikadu kleur, maibé nia la preokupa tanba moras ne’ebé nia sofre la’ós moras grave, nune’e nia kontinua bá halo serbisu hanesan baibain,” Reprezentante família matebian, Domingas da Silva ‘Bilou-Mali’, hateten ba Agência Tatoli iha rezidénsia Kintál-boot, ohin.
Nia konta tuir, iha fulan-tolu ikus matebian sente la saudável ona, nune’e nia halo tratamentu iha uma no sente moras ne’e maka’as tan de’it.
“Família lori nia bá halo tratamentu iha Ospitál Nasionál no to’o iha ne’ebá doutór sira hateten matebian hetan ona moras grave, nune’e doutór sira rekomenda bá halo tratamentu iha rai-li’ur,” nia tenik.
Notísia relevante : Lú-Olo Hili Tenente Koronel Maucalo ba Xefe Casa Militár
Ho nune’e, família sira lori Komandante Maucalo bá halo tratamentu iha ospitál Malázia.
“Matebian konsege rekupera no fila mai Timor iha inísiu fulan-outubru, nune’e doutór husu para matebian atu bá halo tratamentu fali ba nia moras nune’e iha tiha Malázia, moras ataka fali matebian no to’o hakotu iis,” Reprezentante família konta tuir.
Família daudaun halo ona koordenasaun ba Xefe Estadu Maiór Jenerál F-FDTL, Tenente Jenerál Domingos Raul ‘Falur Rate Laek’ atu koordena no Embaixada Timor-Leste iha Malázia atu trata dokumentu no transporta mate-isin husi Malázia mai Timor.
“Família halo hela preparasaun iha matebian nia rezidénsia iha Kintál-boot tanba matebian nia uma mak ne’e. Nia mate isin sei lori mai iha ne’e. Ami Agora koordena ona ho Tenente Jenerál Falur hodi ko’alia ho ita-nia Embaixada iha Malázia oinsá atu lori mate-isin husi Malázia mai Timor-Leste, konforme aban ka bain-rua mate-isin bele to’o iha Timor no família sira sei bá simu,” nia informa.
Bilou-Mali dehan, hanesan família nia sente triste tanba lakon maun ida iha família laran.
“Ami sente triste, maibe ida-ne’e mak Maromak nia planu,” nia katak.
António Soares da Silva ‘Maucalo’ Moris iha Makadiki Uatulari, munisípiu Viqueque, iha loron 09 dezembru 1962.
Molok invasaun Maucalo tama FALINTIL nu’udar Soldadu iha Sentru Instrusaun Taibessi, Dili. Hafoin invazaun, Maucalo kontinua sai Militár ho kargu soldadu parténsia ba kompañia movel ho Komandu Paulino da Gama Mauk Moruk iha Setór Ponta Leste.
Iha tinan 1976, Maucalo asume kargu hanesan Komandante Pelotaun móvel ne’ebé ikus mai transforma ba forsa intervensaun.
Iha tinan 1977 to’o 1978, Maucalo nomeadu hanesan Komandante Pelotaun kompañia dahuluk de Choque .
Hafoin zona libertada rahun, husi tinan 1979-1980, Maucalo kontinua hanesan Komandante Pelotaun Forsa Konsentrada.
Depois konferénsia reorganizasaun nasionál iha tinan 1981, Maucalo ezerse kargu Komandante Pelotaun ba kompañia dahaat husi Brigada Vermella ne’ebé kolokadu iha rejiaun Nakroma.
Husi tinan 1984 to’o 1991, Maucalo asume kargu Komandante daruak ba datoluk unidade ba forsa konsentrada.
Batalliaun 303 husi forsa invanzasaun Indonézia kaptura Maucalo iha lorom 20 juñu 1991 no sai prizoneiru iha Soibada no Ainaro iha tinan 1996.
Iha prizaun, Maucalo envolve iha atividade organizasaun flFrente Klandestina to’o tinan 1999, ikus mai reingresu ba Forsa Armada FALINTIL.
Iha períodu Independénsia, Maucalo asume kargu nu’udar Xefe Repartisaun ba Justisa F-FDTL nian.
Iha tinan 2017 to’o 2022, Maucalo nomeadu no asume kargu nu’udar Xefe Kaza Militár iha Presidénsia Repúblika ho Postu Koronel F-FDTL.
Jornalista : Natalino Costa
Editora : Julia Chatarina
