OÉ-CUSSE, 13 Outubru 2024 (TATOLI) – Delegasaun husi Provínsia Nusa Tenggara Timur (NTT) hamutuk na’in-221 hahú, ohin, mai ona Rejiaun Administrativa Espesiál Oé-Cusse Ambeno (RAEOA), liuhusi fronteira Sakato atu partisipa Festivál Kultura Fronteira.
Delegasaun sira ne’e husi Belu na’in-66, Walikota Kupang 38, Kabupaten Timor Tengah Utara 32, Malaka 31, Kupang 36 no reprezentante Provínsia NTT na’in-18.
Tuir observasaun jornalista Tatoli, hafoin delegasaun hirak-ne’e to’o, loraik ne’e, iha fronteira Sakato, lia-na’in sira husi suku 18 simu ho kultura Oé-Cusse Ambeno nian no simu direita mós husi Prezidente RAEOA, Rogério Tiago Lobato, Sekretáriu Estadu Arte no Kultura, Jorge Soares Cristovão no Prezidente CNC, I.P, Hugo Fernandes.
“Benvindu mai Timor-Leste. Ohin, ami simu ita-boot sira, nune’e aban ita hamutuk realiza Festivál Kultura ne’e iha Oé-Cusse”, Jorge Soares Cristovão hato’o iha fronteira Sakato.
Iha biban hanesan, Prezidente RAEOA, Rogério Tiago Lobato, mós kontente simu maun-alin sira husi Indonézia no agradese ba Governu sentrál, liuliu SEAK no CNC ne’ebé realiza eventu ne’e iha Oé-Cusse durante semana ida.
“Ha’u kontente tanba mehi ne’e ohin sai realidade, katak ita presiza tuur hamutuk nahe ita-nia biti boot para ita ko’alia, tanba funu ida-ne’ebé naruk halo vítima husi parte rua ne’e hotu. Imi ne’ebé defende uluk integrasaun iha Timór, ami ne’ebé defende independénsia. Ohin, ami kontente bele simu imi, ami hahú prosesu ne’e iha 1994, bainhira halo konferénsia rekonsiliasaun iha Londres hamutuk ho Embaixadór Fanny Habibi, Prezidente Habibie nia alin rasik”, nia relembra.
Hodi afirma katak momentu sira hanesan ne’e tenke halo beibeik, tenke la’o bá-mai, ko’alia no halo pás no tenke haku’ak malu.
“Buat ne’ebé liu, liu ona, ne’e hanesan mota boot lori kedas bá tasi. Agora, ita tenke hamutuk lori ita-nia amizade bá oin, iha idak-idak nia rai, maibé ita labele haluha mós katak ita-nia kultura no abut ne’e mai husi hun ida de’it. Tempu hirus nian hotu ona, tempu agora ita habelun malu, konflitu boot entre Timor-Leste ho Indonézia hotu ona, agora kooperasaun entre Indonézia no Timor-Leste sai ezemplu ba mundu tomak”, nia akresenta.
Tuir ajenda, Festivál Fronteira ne’e realiza iha Oé-Cusse durante semana ida, hahú loron 14 no sei remata iha 18 Outubru 2024. Eventu ne’e ho tema ‘Interkámbiu kulturál ba hametin rekonsiliasaun’ ne’ebe organiza husi Sekretaria Estadu Arte no Kultura no Sentru Nasionál Chega!, Institutu Públiku.
Notísia relevante: UPF no Satgas-TNI fó sai regra tolu atu kumpre durante Festivál Fronteira iha Oé-Cusse
Jornalista: Abílio Elo Nini
Editora: Maria Auxiliadora
