VIQUEQUE, 14 outubru 2024 (TATOLI)- Estudante anu letivu 2024 husi munisípiu Viqueque na’in-3.232, segunda ne’e, tuir ezame nasionál.
Tuir dadús estudante klase 3 husi munisípiu Viqueque ne’ebé atu partisipa ezame nasionál kompostu husi EBC no EBF totál hamutuk 1.752, ESG no ESGF 1.398, ESTV hamutuk na’in-82 ho totál hamutuk 3.232 husi eskola 44 iha munisípiu Viqueque.
Estudante ne’ebé partisipa iha ezame nasionál husi Ensinu Báziku Sentrál (EBC, sigla Portugés), Ensinu Baziku Filiál (EBF), Ensinu Sekundáriu Jerál (ESJ), Ensinu Sekundáriu Filiál (ESF) no Ensinu Sekundáriu Tékniku Volasionál (ESTV).
Iha serimónia abertura, Diretor Jerál Edukasaun Pre-Eskolár Ensinu Báziku no Ensinu Rekorrente husi Ministériu Edukasaun (ME), Apolinário Serpa Rosa, haktuir, estudante husi Ensinu Báziku Sentrál (EBC, sigla Portugés), nunu anu no sekundáriu klase 3 partisipa hotu ezame nasionál hodi determina sira futuru.
“Ohin, estudante sira tuir ezame nasionál, hein katak estudante sira preparadu no hetan valór di’ak iha ezame nasionál. Tanba estudante sira-ne’e mak nu’udar jerasaun foun nasaun Timor Leste, nune’e estudante sira tenke hatudu prestasaun iha ezame”, Apolinário Serpa Rosa, hateten iha serimónia abertura ezame nasionál, iha EBC 01 Beloi, Viqueque Vila, ohin.
Apolinário husu agradese ba profesór sira ne’ebé durante ne’e akompaña estudante sira iha munisípiu Viqueque no profesór sira ho rezultadu di’ak, nune’e sira bele tuir ezame nasionál.
“Nune’e sei justifika katak kualidade edukasuan iha munisípiu Viqueque sei hatudu liuhusi ita-nia oan sira rezultadu valór ne’ebé sira ida-idak hetan iha ezame nasionál. Ha’u espera ba ezame nasionál ba tinan 2024 estudante sira bele hetan valór boot iha territóriu Timor Leste”, nia hato’o.
Ezame nasionál ne’e fahe ba rua hanesan ezame nasionál no ezame lokál ne’ebé durante semana ida hahú segunda 14 to’o 21 Setembru.
Iha fatin hanesan, Reprezentante Prezidente Autoridade Munisípiu Viqueque, Carlos De Araújo Geronimo, haktuir esforsu ne’ebé ME halo hanesan infraestutura, formasaun ba profesór no programa sira seluk, ikus mak realizasaun ezame nasionál ba estudante sira.
“Ezame nasionál sai hanesan sasukat ida estudante sira, oinsá mak bele gaina prestasaun iha Ensinu. Tanba estudante sira ne’e aprrende iha eskola kuaze tinan naruk hafoin partisipa ezame nasionál. nune’e ha’u mós husu agradese ba profesór sira iha munisípiu Viqueque ne’ebé durante ne’e hanorin estudante sira, espera iha ezame nasionál ne’e estudantre sira bele hetan rezultadu di’ak”, nia afirma
Jornalista : Vitorino Lopes da Costa
Editór : Floréncio Miranda Ximenes
