LISBOA, 14 outubru 2024 (TATOLI) – Primeiru Ministru (PM), Kay Rala Xanana Gusmão, konsidera apoia no solidaridade husi Estadu Portugál iha área konstrusaun estadu no dezenvolvimentu umana.
Xefi Governu, Xanana Gusmão, liuhusi sorumutu ho Primeiru Ministru Repúblika Portugál, Luís Montenegro agradese ba governu Portugál ne’ebé simu ona komitiva husi Timor-Leste no konsidera nu’udar símbolu solidaridade entre povu husi nasaun rua.
“Ami hato’o agradese ba solidariedade husi sosiedade Portugés durante Timor-Leste nia luta, bainhira laiha apoia husi Portugál bele dehan Timor-Leste seidauk hetan ninia independénsia” Primeiru Ministru Xanana Gusmão hateten iha Lisboa, tersa ne’e.
Prezensa membru governu husi Timor-Leste iha Portugál parte husi sentidu solidariedade ne’ebé nakonu ho amigavél no sinál hodi hametin liután relasaun entre povu nasaun rua hanesan asina akordu kooperasaun inportante sira entre governu Portugál ho Timor-Leste.
Líder nasionál ne’e, argumenta, Portugál ho Timor-Leste selebra hamutuk tinan-50 ba revolusaun flores iha fulan-abríl no tinan-25 loron konsulta popular 1999 ne’ebé sai sinál importante atu liga povu husi nasaun rua.
Loron-25 abríl tinan-1974 sai oportunidade ba Timor-Leste atu luta hodi deside independénsia no to’o iha loron-30 agustu iha nia rezultadu hodi Timor-Leste sai nu’udar nasaun independénsia iha mundu ne’ebé apoia totál husi Portugál.
Governu Timor nafatin konsidera solidariedade hotu ne’ebé sosiedade Portugés halo durante prosesu hotu relasiona ho luta ba independénsia tanba ho apoia sira-ne’e ikus mai Timor-Leste hetan liberdade.
Timor-Leste nu’udar nasaun foun hasoru difikuldade ho nia obstalku no dezafiu hotu nune’e konsidera inportante halo kooperasaun ho estadu no governu Portugál iha kontektu dezenvolvimentu povu.
“Ami senti apoia solidariedade hotu husi estadu no instituisaun governu Portugál ba serbisu ba moris diak labarik no joven iha Timor-Leste no konsolidasaun konstrusaun estadu,” Xanana Gusmão.
Portugál nia apoia iha área formasaun ajuda ona Timor-Leste liuliu Juventude sira hodi iha kuiñesementu kona-ba konstrusaun estadu liuhusi setòr ekonomia sustentável.
Xefi governu Timor-Leste mos hato’o konvite espesiál ba Primeiru Ministru Repúblika Portugál atu vizita Timor-Leste iha tinan oin fulan Juñu hodi partisipa konferénsiansia entre nasaun sira iha Asiatiku.
Delegasaun governu Timor-Leste lideradu Primeiru Ministru nia prezensa iha Portugál durante loron-lima hanesan inkontru Ofisiál ho Prezidente Portugál, Primeiru Ministru, Prezidente Asemblea Republika Portugál no enkontru ho Prezidente Supremu Justisa Portugál.
Alende ne’e, Delegasaun Timor-Leste halao sorumutu ho estudante no Timor oan sira iha Portugál, inkontru ho reitores Universidade iha Portugál no asina protokolu relasiona ho estudante sira no halo lansamentu ba livro diskursu Xanana Gusmão no pouzia “Mauberiadas”.
Notísia relevante: PM Xanana husu timoroan sira iha Portugál kontribui ba prosesu dezenvolvimentu nasaun
Jornalista : Natalino Belo
Editór : Evaristo Soares Martins
