Labarik feto hamutuk rihun 56-resin simu vasina HPV
DILI, 14 outubru 2024 (TATOLI) – Labarik feto ho idade 11-14 iha Timor-Leste hamutuk rihun 56-resin simu ona vasina Human Papilloma Virus (HPV) hodi prevene kankru serviks.
‘’Vasinasaun ne’ebé ita hahú hala’o ne’e iha loron 23 setembru, ita foka liu ba labarik feto idade 11-14 ne’ebé ita vasina ona hamutuk rihun 56-resin ka 91,3%”, Xefe Departamentu Imunizasaun iha Ministériu Saúde, Onna Pereira, informa iha Novo Turismo, ohin.
Nia dehan, vasina ne’e destina ba estudante sira iha eskola sira tanba Ministériu Saúde kolabora ho Ministériu Edukasaun hodi fó vasina ba labarik feto sira atu bele prevene kankru serviks ba futuru.
“Importánsia ba vasina HPV ne’e hodi prevene ba moras kankru serviks, entaun ita mós hatene katak ita-nia dadus kankru serviks iha ita-nia rain ho númeru ne’ebé aumenta ba beibeik, entaun ho ida-ne’e mak MS, OMS no UNICEF fó hanoin ne’ebé di’ak no fó prioridade ba ita-nia labarik feto idade 11-14 ho razaun katak feto mak risku ba moras ida-ne’e”, nia esplika.
Tanba ne’e, nia afirma, Ministériu Saúde nia alvu ba labarik feto ho idade 11-14 ne’ebé simu vasina HPV hamutuk rihun 63 iha territóriu nasionál.
“Ita-nia tarjetu ba labarik feto ho idade 11-14 ne’ebé atu simu vasina HPV ne’e hamutuk rihun 63, entaun agora ita vasina ona ba 91,3%. Iha fulan ida-ne’e remata, ita sei finaliza atividade vasina, maibé bainhira dadus ne’e seidauk atinje ba 95%, ita halo outreach ba komunidade sira buka hodi tuir labarik feto sira ne’ebé iha momentu seidauk vasina iha tempu kampaña nian, ita buka tuir hodi kompleta ita-nia vasinasaun ida-ne’e”, nia subliña.
Nia relata, stock vasina HPV iha Institutu Nasionál Farmásia Produtu Medikamentu (INFPM) sei sufisiente atu atende ba labarik feto ho idade 11-14 iha teritóriu Timór laran tomak.
Jornaliista : Felicidade Ximenes
Editór : Zezito Silva
