VIQUEQUE, 14 outubru 2024 (TATOLI)- Diretór Servisu Agrikultura Munisípiu Viqueque, Olivio Soares Freitas, informa Ministériu Agrikultura Peska, Pekuária no Floresta (MAPPF) apoia tán ekipamentu agrikultura liuliu tratór bo’ot no tratór ki’ik hamutuk unidade 32 ba munisípiu Viqueque.
Tuir dadús tratór ne’ebé distribui mai munisípiu Viqueque hamutuk unidade 32 kompostu husi tratór ki’ik unidade 30 no tratór boot unidade 2.
“Foin lalais ne’e, ita simu tan ona tratór husi MAPPF nasionál no tulan ona mai Viqueque, nune’e ekipamentu sira-ne’e agora daudaun ita asegura iha edifísiu autoridade munisípiu Viqueque”, Olivio Soares Freitas, hateten ba jornalista sira, iha ninia knaar fatin Beloi, ohin.
Tuir planu Ministru Agrikultura Peska, Pekuári no Floresta (MAPPF), Marcos da Cruz, maka sei ofisiál distribui direta ba Prezidente Autoridade Munisípiu Viqueque iha, sesta semana ida-ne’e.
Ho ekipamentu tratór unidade 32 sei reforsa liután ba atividade agrikultura iha munisípiu Viqueque hodi apoia agrikultór sira-nia natar no toos.
“Hafoin distribuisaun tiha,ami sei fó formasaun ba operadór sira, atu sira iha koñesementu ba tratór bo’ot nian, hafoin halo operasaun ba ekipamentu sira-ne’e”, nia realsa.
Enkuantu, Iha fulan-marsu MAPPF distribui uluk tratór boot hamutuk unidade haat, tratór tuan unidade 39, maibé balun kondisaun aat, seidauk halo manutensaun.
Jornalista : Vitorino Lopes da Costa
Editór : Floréncio Miranda Ximenes
