OÉ-CUSSE, 14 Outubru 2024 (TATOLI) – Ministru Agrikultura Pekuária, Peska no Floresta, Marcos da Cruz, no Vise-Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, entrega ofisialmente ekipamentu agríkola hanesan hand tractor 25 no tratór boot rua ba Autoridade Rejiaun Administrativa Espesiál Oé-Cusse Ambeno (RAEOA).
Mariano Assanami haktuir katak Planu Estratéjiku Dezenvolvimentu Nasionál define setór importante tolu mak minerál no rekursu naturál, turizmu no setór agrikultura, peska, pekuária no floresta, ne’ebé sai hanesan aliserse ba ekonomia nasaun.
“Governu kontinua apoia [ekipamentu agríkola] atu hahú teknolojia foun ne’e. Sei apoia beibeik, nune’e bele la’o ba oin. Kuidadu hanesan kuidadu ita-nia isin, sei ita la kuidadu ita-nia isin hanesan tratór ne’e, nia aat lalais de’it, maibé kuída ho domin no fuan, buat hotu sei di’ak. Ha’u husu ita hamutuk hasa’e produsaun. Agrikultura, peska, pekuária no floresta ne’e tenke sai duni poténsia ne’ebé planeia iha ita-nia Planu Estratéjiku Dezenvolvimentu Nasionál, para nia sai ai-riin ekonomia populár nian”, nia apela.
Governante ne’e husu atu jestaun ba ekipamentu sira ne’e tenke halo direta iha Ministériu Agrikultura, Pekuária, Peska no Floresta (MAPPF), tanba ne’e ministériu iha ona planu atu haree ida-ne’e hamutuk ho autoridade RAEOA.
Iha ámbitu disponibiliza mákina sira ne’e, Ministru Agrikultura, Marcos da Cruz, mós dehan MAPPF kontinua aposta ba kualidade produtu hodi hamenus dependénsia ba produtu importadu.
“Ekipamentu sira-ne’e atu reforsa setór agrikultura iha Oé-Cusse, tanba ita atu dezenvolve setór ne’e ho polítika ida agrikultura orgánika. Ita rai ki’ik ida, ita ko’alia ba kuantidade, ita labele kompete ho nasaun seluk, tan ne’e ita tenke aposta ba kualidade ita-nia produtu”, nia afirma.
Governante ne’e apela ba utilizadór sira presiza kuidadu mákina sira ne’e, tanba ekipamentu ne’ebé Estadu sosa atu apoia serbisu agrikultór sira.
“Depende ba natar na’in-sira, ita bele utiliza ekipamentu sira-ne’e ho di’ak atu fasilita ita, hakmaan ita-nia serbisu. Agora, ita mai ho tratór sira oinsá atu fila rai. Ba oin ita sei haree atu introdús ona kuda no ko’a haree nian, tanba daudaun ne’e sei tradisionál. Maibé, ba oin ita buka atu fasilita ita-nia agrikultór sira halo natar ne’e sente a vontade”, dehan.
Prezidente Autoridade RAEOA, Rogério Tiago Lobato, agradese ba Ministériu Agrikultura tanba kontinua fó tulun ba RAEOA hodi reforsa setór agrikultura Oé-Cusse.
“Tanba ita-boot sira tau atensaun mós ba Oé-Cusse. Uluk apoia ami ró lima atu tulun ita-nia peskadór sira. Ohin, apoia tan tratór. Ida-ne’e ha’u kontente tanba ita-nia hakarak agrikultura tenke forte, ita tenke dudu ba oin. Ha’u espera sasán sira-ne’e ami sei kuída, tanba tratór mós hanesan ema, ita labele uza de’it, maibe ita lahetene atu kuidadu ne’e susar uitoan”, nia salienta.
Notísia relevante: RAEOA simu ona ekipamentu agríkola hodi reforsa serbisu agrikultór sira
Jornalista: Abílio Elo Nini
Editora: Maria Auxiliadora
