DILI, 14 outubru 2024 (TATOLI)–Ministru Edukasaun (ME) interinu no Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, husu estudante iha territóriu atu kompetente iha disiplina hodi sujeita ba ezame nasionál.
“Imi bele hatudu-an nu’udar ema ne’ebé kompetente iha disiplina sira-ne’ebé sujeita ba ezame nasionál. Nune’e hetan valór ne’ebé di’ak hodi sai sasukat prova durante finalista husi tinan klase 9 no 12, prepara imi-nia an ho di’ak atu tuir ezame nasionál ne’ebé ohin hahú ona. Imi-nia rezultadu aprendizajen durante tinan-sia iha Ensinu Báziku no tinan-tolu iha Ensinu Sekundáriu sei sukat liuhusi prova ne’e. Tanba ne’e, esforsu no susesu iha imi-nia liman,” Sekretáriu Estadu hateten iha Vila-Verde, segunda ne’e.
Notísia relevante : ME hahú halo imprensaun ba pontu ezame nasionál
Governante ne’e iha esperansa atu estudante sira bele hetan rezultadu di’ak maski iha preokupasaun balun. Nune’e, profesór hamutuk ho inan-aman tenke motiva no fó korajen ba estudante sira hodi bele hetan susesu iha ezame nasionál.
“Mai ita suporta oan doben sira liuhusi kria ambiente ne’ebé hakmatek, kalma no konfortável ba oan sira atu estuda iha uma. Nu’udar inan-aman no enkarregadu edukasaun, presiza evita situasaun ruma ne’ebé bele perturba labarik sira-nia preparasaun hasoru ezame nasionál iha tinan hanorin 2024,” nia akresenta.
Estudante ne’ebé tuir ezame nasionál tinan ne’e husi Ensinu Báziku hamutuk 29.252 kompostu husi mane 14.552 no feto 14.700. Ensinu Sekundáriu Jerál hamutuk 24.894 fahe ba siénsia no teknolojia 13.020 no siénsia sosiál umanidade iha 11.854. Ensinu Tékniku Vokasionál hamutuk 4.125 kompostu husi eskola téknika 1.878, eskola ekonomia no komérsiu 986, eskola otelaria no turizmu 416, eskola agríkola no peska 845. Ensinu Rekorente hamutuk 364 kompostu husi mane 267 no feto 97.
Jornalista : Osória Marques
Editora : Julia Chatarina
