DILI, 14 outubru 2024 (TATOLI) – Fundu Nasaun Unidas ba Populasaun (UNFPA), ho Ministériu Saúde (MS) realiza workshop protokolár kuidadu Antenatal no kuidadu pos-natal ba profisionál saúde sira husi munisípiu 13 atu hadia kualidade atendimentu ba taxa mortalidade inan no bebé foin moris.
“Ohin ita loke seksaun orientasaun loron tolu ba pesoál saúde sira husi munisípiu 13 atu sai fasilitadór ba servisu ante-natal no pos-natal ho objetivu atu deteta ba ita-nia inan feton sira ne’ebé mak períodu isin rua no mós ba ita-nia inan feton sira depois partu, entaun bainhira sira fila fali ba oinsá halo planu atu orienta pesoál saúde sira hanesan parteira, médiku sira ne’ebé servisu área saúde materna infantil, atu hadia kualidade servisu hodi atende ba taxa mortalidade inan no bebé foin moris”, Reprezenatante UNFPA iha Timor-Leste, Domingas Bernardo ba jornalista sira iha Novo Turismo, ohin.
Nia esplika, orientasaun ida-ne’e atu hadia kualidade atendimentu ba inan no bebé foin moris sira iha kada fasilidade saúde sira iha Timor-Leste.
“Ita-nia gia ne’e mak ajuda sira atu halo servisu di’ak liután ba inan no oan sira, tanba atividade ne’e suporta husi Governu Japaun ba tinan tolu hamutuk $7,5 mil”, nia dehan.
Iha fatin hanesan, Xefe Departamentu Saúde Materna Infantil, iha Ministériu Saúde (MS), Lucia Lay, rekorda atividade ida-ne’e realiza uluk ona iha tinan kotuk 2023 no forma ona orientadór ba kuidadu ante-natal no pos-natal ba hadia kualidade atendimentu ba inan no bebé foin moris sira.
“Orientasaun ba ante-natal no pos-natal ida-ne’e ho nia objetivu atu deteta ba ita-nia inan feton sira ne’ebé mak períodu isin-rua no mós ba ita-nia inan feton sira depois partu atu mantein kualidade servisu saúde maternu infantil iha ita idaidak nia munisípiu hodi hatún taxa mortalidade ba inan no bebé foin moris iha ita-nia rain”, Lucia Lay afirma.
Konselleira, Vise Xefe Misaun, Embaixada Japaun iha Timor-Leste, Sakai Yuki, esplika pontu importante liu ba Governu Japaun mak oinsá Timor-Leste bele hadia di’ak liután ba ante-natal no pos-natal, hadia kualidade atendimentu ba inan no bebé foin moris.
Jornalista : Felicidade Ximenes
Editór : Zezito Silva
