Ema 456 mak simu ona vasina rabies
DILI, 15 outubru 2024 (TATOLI) – Responsavel Programa Rabies iha Ministériu Saúde, Aida dos Santos, hateten ema hamutuk 456 mak simu ona vasina rabies iha Munisípiu Dili,Covalima, Bobonaro no RAEOA.
“Ita halo ona vasina ba moras Rabies ka asu tata ema ne’e iha Munisípiu haat hanesan Covalima, Bobonaro, RAEOA no mós Dili, entaun ema ne’ebé simu ona vasina ne’e hamutuk 456’’, Aida dos Santos informa iha Novo Turismo, ohin.
Aida esplika, tinan ne’e ema pozitivu ba rabies seidauk iha, tanba ne’e mak Governu implementa de’it vasinasaun bainhira asu tata karik halo prevensaun liu husi vasina.
“Iha tinan ida-ne’e ba ema pozitivu ba rabies seidauk iha, entaun ita halo vasinasaun de’it, karik asu tata ema tuir nia grau rua ba leten ita persiza vasina hodi halo prevensaun”, nia afirma.
Rabies mak moras ida ne’ebé bele prevene ho vasina, zoonótika no vírus ne’ebé afeta sistema nervozu sentrál. To’o 99% hosi kazu sira moras-rabia nian iha ema, asu sira mak responsavel ba transmisaun vírus nian. Labarik sira entre tinan 5 to’o 14 sai vítima beibeik. Rabies infeta mamíferu sira, inklui asu, busa, animál hakiak no animál fuik sira.
Jornalista : Felicidade Ximenes
Editór : Zezito Silva
