Estudante na’in-tolu tuur iha kadeira ida kontra regra ME
DILI 15 outubru 2024 (TATOLI)—Diretór Jerál Ensinu Sekundáriu Jerál iha Ministériu Edukasaun (ME), Deolindo da Cruz, konsidera, estudante na’in-tolu tuur iha kadeira ida iha loron ezame nasionál ne’e kontra regra.
Diretór hato’o lia hirak ne’e relasiona ho identifikasaun iha Eskola Ensinu Sekundáriu Jerál Nobel da Paz, iha estudante na’in-tolu tuur iha kadeira ida no laiha espasu entre sira.
“Ida-ne’e ha’u seidauk simu informasaun maibé ha’u konfirma lai ho Edukasaun munisípiu Dili tanba sira mak bele kontrola direta, depois buat ruma informa mai ami. Ami labele hakat liu Edukasaun munisipál nia serbisu,” Diretór Deolindo da Cruz, informa ba Agência Tatoli, via telefónika, tersa ne’e.
Notísia relevante : ME hahú halo imprensaun ba pontu ezame nasionál
Nune’e, Jerente ne’e sei konfirma no koopera ho Edukasaun munisipál hodi bele iha rezultadu.
“Tanba sá mak kadeira ida ema na’in-tolu mak tuur. Ida-ne’e presiza hatene tanba ezame nasionál nia regra ne’e ema ida tuur kadeira ida,” nia akresenta.
Iha sorin seluk, Diretór Eskola Ensinu Sekundáriu Jerál Nobel da Paz, Jeremias Pinto de Jesus, konfirma katak, estudante na’in-tolu tuur iha kadeira ida ne’ebé naruk.
“Orden ha’u simu dehan ema na’in-tolu, hanesan eskola públiku sira-ne’e na’in-tolu labele tuur iha kadeira ida, mais ami-nia ne’e kadeira naruk na’in-tolu bele tanba vijilante iha Diretór munisípiu mai haree kedas katak dehan buat ne’e di’ak hela,” nia katak.
Estudante ne’ebé tuir ezame husi Siénsia Naturál hamutuk 332, Siénsia Sosiál 339, ne’ebé totál Ensinu Sekundáriu ne’e hamutuk 671. Ensinu Báziku 336, entaun totál Ensinu Sekundáriu no Ensinu Báziku Sentrál (EBC, sigla portugés) hamutuk 1.007.
“Orsida ezame finál hotu mak ita haree katak ita-nia estudante sira ne’e prezensa hotu ka lae,” nia tenik.
Vijilante iha eskola ne’e mai husi eskola sira iha Dili laran no profesór sira husi Eskola Nobel da Paz destaka fali iha eskola seluk.
Jornalista : Osória Marques
Editora : Julia Chatarina
