OÉ-CUSSE, 15 Outubru 2024 (TATOLI) – Vise-Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, lansa livru Quadrinneal Periodical Reports UNESCO 2005 no Festivál Fronteira 2023 nian iha Rejiaun Administrativa Espesiál Oé-Cusse Ambeno (RAEOA).
Diretór-Ezekutivu Sentru Nasionál Chega!, Institutu Públiku (CNC, I.P), Hugo Maria Fernandes, informa livru ne’e nu’udar sínteze ida husi semináriu Festivál Fronteira 2023 iha munisipíu Bobonaro, bainhira konvida oradór sira hato’o palestra.
Nune’e, CNC hanoin katak labele husik de’it, maibé konsege halo gravasaun ba palestra sira hotu no hetan apoiu husi Padre Gregor Neonbasu, antropólogu husi Universidade Katólika Widia Mandiri ho nia grupu mak konsege prodús livru festivál ne’e.
“Ne’e atu hatudu de’it pasu ida tan katak saida mak halo iha tinan kotuk, ohin ita hatudu rezultadu ida. Nune’e, kada tinan kontinua halo esforsu ne’e atu hatudu duni vontade di’ak husi Governu Timor-Leste nian”, Hugo Fernandes dehan iha Otél Ambeno, ohin.
Nia lembra katak, iha 2023, oradór sira maioria ko’alia kona-ba aspetu sosiokulturál, antropolojia istória no polítika, ne’ebé lori husi períodu antes kolonializasaun to’o ba iha país modernu.
“Livru ne’e la’ós hakerek foun, maibé kompilasaun husi rezultadu palestra sira-ne’ebé halo iha semináriu Festivál Fronteira 2023 nian iha Bobonaro ho totál pájina 255”, nia adianta.
Iha fatin hanesan, Sekretáriu Estadu Arte no Kultura (SEAK), Jorge Soares Cristovão, mós informa katak lansamentu livru ho naran Quadrinneal Periodical Reports, tanba Timor-Leste nu’udar Estadu membru ba UNESCO, iha obrigasaun atu hato’o relatóriu ba konvensaun UNESCO 2005 kona-ba protesaun no promosaun diversidade espresaun kulturál, ne’ebé polítika ne’e iha Timor-Leste husi 2021 to’o 2024.
“Tanba relatóriu ne’ebé kobre mós husi Festivál Fronteira 2023 nia atinjimentu boot ida mak implementasaun konvensaun 2005 nian, liuhusi modalidade artista profisionál no kultura husi Indonézia no Timor-Leste hodi promove indústria kriativa ita-nian”, dehan.
Notísia relevante: Abertura Festivál Fronteira: Hametin rekonsiliasaun ho espíritu koezaun sosiál no kulturál
Jornalista: Abílio Elo Nini
Editora: Maria Auxiliadora
