OEKUSI, 01 Jullu 2026 (TATOLI) – Parlamentu Nasionál (PN) liuhusi Komisaun E trata asuntu infraestrutura, kuarta ne’e, hala’o enkontru ho Autoridade Rejiaun Administrativa Espesiál Oekusi Ambeno (RAEOA), hodi fiskaliza direita ezekusaun projetu 80 iha Oekusi, hanesan projetu 27 husi fundu RAEOA no projetu 53 implementa liuhusi Fundu Espesiál Dezenvolvimentu (FED), ne’ebé tuir planu sei fizkaliza iha loron kinta-feira ohin, 02 Jullu 2026.
“Mai atu rona direita no fiskaliza obra sira iha terrenu husi fundu RAEOA iha projetu 27 no husi FED nian 53, iha mós projetu balun la’o hela no balun finaliza ona no balun seidauk la’o, ne’e maka ami mai haree, sira-ne’ebé lala’o ne’e, nia problema ida ne’ebé, atu hetan nia solusaun, nune’e kompañia bele kompleta, ou kompañia nia ekipamementu mak la to’o ka ou nia fundu mak la sufisiente,” Prezidente Komisaun E, Marcos Xavier hateten ba jornalista iha salaun Gabinete Oekusi, kuarta ne’e.
Notísia relevante:Aselera pagamentu ba projetu 53 iha Oekusi
Reprezentante povu nia lian iha uma-fukun Parlamentu Nasionál ne’e, informa, ba projetu sira-ne’ebé finaliza ona, presiza nia kualidade iha ka la’e, no oinsa nia pagamentu sira, tanba ne’e maka Serbisu Rejionál Obra Públika Oekusi, sei akompaña hodi tuun ba terrenu atu haree direita projetu sira.
“Ohin mós parte SAS aprezenta kona-ba projetu perfurasaun bee-moos tanba komunidade sira-nia preokupasaun durante ne’e ba asuntu tolu de’it, estrada bee-moos ho elétrisidade atu fasilita sira nia atividade, atu asesu ba ahi no lori produtu ba eskola no tenki asesu bee-moos ho di’ak,” nia hateten.
Notísia relevante:Obra Públika hasai sirkulár, projetu emerjénsia 20-resin iha Oekusi re-ativa
Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, konsidera fiskalizasaun ne’e importante, nune’e bele hetan rekomendasaun ba futuru bele hadi’a relasaun ho koordenasaun ho Ezekusaun Orsamentu Jerál Estadu (OJE) nian.
“Enkontru ohin ne’e, iha asuntu rua; primeiru, vizita fiskalizasaun ne’e atu mai haree saida maka tinan kotuk husi Komisaun C mai konfirma ona iha 2025 no ohin mai konfirma tan iha nia implementasaun iha terrenu iha orsamentu 2026, ohin ita informa ho eskritasaun no mós estatement depois ba fiskaliza direita iha obra sira iha terrenu, tinan kotuk sira ba iha Taiboko maibé tinan ne’e sei ba fali obra sira fatin seluktan, daruak kona-ba projetu infraestrutura, relasaun ba OJE 2026 iha projetu balu sei sai polémika iha tinan-2025, entaun saida maka RAEOA halo ona atu bele rezolve, ne’ebé ita agradese tanba liuhusi fiskalizasaun ne’e ita bele hetan rekomendasaun atu hadi’a iha futuru,” nia hateten
Aleinde ne’e mós, parte Komisaun C konfirma kona-ba reseita sira iha RAEOA durante trimestre daruak liliu ba Diresaun Tranporte Terrestre no Komunikasaun, inklui kon-ba karta kondusaun tanba RAEOA nian sei kontinua provizória no Eletrisidade de Timor-Leste (EDTL) tanba povu maioria iha Oekusi 80% uza gratuita, inklui reseita ba Água Saneamentu nian.
Notísia relevante:PM Xanana rekomenda tékniku DRI ‘kontrola’ kualidade projetu sira iha Oekusi
Baze legál ne’ebé reforsa knaar fiskalizasaun nian
Atu legaliza no hametin asaun ne’ebé Komisaun Parlamentár sira halo iha Oekusi, asaun ne’e bazeia ba kuadru legál no konstitusionál Repúblika Demokrátika Timor-Leste nian mak Konstituisaun Repúblika Demokrátika Timor-Leste (K-RDTL) Artigu 95.º (Kompeténsia Parlamentu Nasionál nian), Artigu 71.º (Organizasaun administrativa), inklui Rejimentu Parlamentu Nasionál nian, nune’e mós kriasaun RAEOA no ZEESM (Lei Nu. 3/2014).
Jornalista: Abílio Elo Nini
Editór: Rafael Ximenes de A. Belo
