OEKUSI, 08 Maiu 2026 (TATOLI) – Diretór Serbisu Rejionál Obra Públika (DSRO), Remigío Nuno Sila, sesta ohin, hasai sirkulár ofisiál ida, hodi orienta ona empreza 24 iha Rejiaun Administrativa Espesiál Oekusi Ambeno (RAEOA), atu kontinua hikas projetu emerjénsia, ne’ebé antes ne’e Autoridade supende dezde loron 10 Marsu 2026.
Sirkulár ofisiál ne’ebé jornalista Ajénsia Tatoli,I.P asesu, ho númeru referénsia 152/RAEOA-TL/SROP/IV/2026, dirije ba Diretór kompañia sira-ne’ebé implementa projetu emerjénsia ho asuntu re-ativu serbisu.
Notísia relevante:Projetu emerjénsia 22 iha Oekusi suspendidu, hein desizaun Konsellu KAFED
Sirkulár ofisiál ne’e, sita dekretu-lei númeru 2/2026, loron 02 fulan-Fevereiru, nu’udar baze ba Fundu Espesiál Dezenvolvimentu (FED) RAEOA nian.
Nune’e mós deliberasaun númeru 02/IV/CAFED/2026, Konsellu Administrasaun Fundu Espesiál Dezenvolvimentu (CAFED), prevista iha ba ártigu 7º (3), (6), (7) no (8) dekretu-lei númeru 02/2026, loron 02 fulan-Fevereiru, segunda alterasaun dekretu-lei. Númeru 01/2015, loron 14 fulan-Janeiru, realiza reuniaun ordinária iha loron segunda-feira, 20 Abril 2026.
“Liuhusi ofisíu ida-ne’e, Serbisu Regionál Obra Públika RAEOA, solisita ba Diretór Kompañia sira-ne’ebe implementa projetu emerjénsia hamutuk 24, ho orsamentu preve ona iha livru Orsamentu Jerál Estadu (OJE) 2026, atu Re-Ativa serbisu iha terenu,” sita iha karta sirkulár ne’ebé Ajénsia Tatoli,I.P asesu, ohin.
Tanba iha loron 10 Marsu 2026 pendente provizóriu ba serbisu bazeia rezultadu monitorizasaun projetu husi ekipa delegasaun Ministériu Obra Públika (MOP) iha RAEOA hodi hein rezultadu husi Konsellu Administrasaun Fundu Infraestrutura (KAFI) husi Ministériu Obra Públiku Nasionál.
“Karta sirkulár ofisiál ne’e, asina direta husi Diretór Rejionál Serbisu Obra Públika Oekusi, Remígio Nuno Sila,”
Notísia relevante:Governu instala sekretariadu jere fundu espesiál dezenvolvimentu iha RAEOA
Jornalista: Abílio Elo Nini
Editór: Rafael Ximenes de A. Belo
