PR fó posse ba Rui Hanjam no Francisco Cepeda bá Embaixadór UEA-Tailándia
DILI, 15 outubru 2024 (TATOLI) – Prezidente Repúblika, José Ramos-Horta, tersa ne’e, iha Palásiu Prezidensiál Dili fó posse ba Rui Manuel Hanjam no Francisco Tilman Cepeda, hodi asume kargu hanesan Embaixadór ba Emiradu Árabe Unidu (UEA) no Tailándia.
Nomeasaun ne’e, Rui Manuel Hanjam, ba kargu Embaixadór Estraordináriu no Plenipotensiáriu Timor-Leste ba Estadu UEA no Francisco Tilman Cepeda ba kargu Embaixador Estraordináriu no Plenipotensiáriu Timor-Leste ba Reinu Tailándia.
Konstituisaun Repúblika Demokrátika Timor-Leste (KRDTL) atribui ba Prezidente Repúblika iha kompeténsia durante ámbitu relasaun internasionál nian atu nomea no ezonera embaixadór sira, reprezentante permanente sira no enviadu estraordináriu sira, tuir proposta husi Governu, tuir buat ne’ebé hakerek iha artigu 87, alínea b.
Bainhira ramata posse, Embaixadór Francisco Tilman Cepeda hateten, kna’ar ne’ebé simu nu’udar responsabilidade boot atu lori Timor-Leste nia naran ba promove iha li’ur no hametin kooperasaun ho nasaun ne’ebé nia halo kna’ar bá.
“Ita nia kooperasaun, hanesan iha Tailándia iha ajénsia ida mak durante ne’e suporta ita maka’as, ema bolu Tailándia Internasionál Coorporation ajénsia, nune’e ita sei hametin liutan atu apoia ita nia dezenvolvimentu nasaun nia”, Embaixadór ne’e kompromete.
Iha fatin hanesan, Embaixadór Rui Manuel Hanjam, dehan, sei hala’o servisu hotu ho responsabilidade hodi hametin relasaun di’ak entre Timor-Leste ho UEA.
” Hakarak agradese ba Prezidente Repúblika no Primeiru-Ministru ne’ebé fó konfiansa mai ha’u, atu ha’u bele sai hanesan Embaixadór iha fatin Emiradu Árabe Unidu, iha ne’ebá ha’u sei hala’o servisu ho másimu,” nia afirma.
Embaixadór ne’e dehan tan, “Ita hotu-hotu hatene Emiradu Árabe Unidu ne’e hanesan país ida ne’ebé kompostu husi estadu hitu, depois sira nia kreximentu ekonómia depende ba minarai, ho gás no sira komesa halo diversifikasaun ba ekonómia, atu la’ós depende de’it ba mina ho gás, maibé sira mós halo alternativu sira seluk atu bele sustenta husi parte ne’ebé halo parte husi mina ho gás ninian. Nune’e ita sei hametin kooperasaun atu apoia ita”.
Entretantu, Tuir dekretu Presidensial Repúblika númeru 105/2024 nomeia Rui Manuel Hanjam, ba kargu Embaixadór Estadu UEA, assina husi Prezidente Repúblika, José Ramos-Horta, iha loron 14 fulan-utubru 2024.
Nune’e mós, dekretu Prezidente Repúblika númeru 106/2024, ezonera Embaixadór Juvêncio de Jesus Martins husi kargu Embaixadór Reinu Tailândia no dekretu Prezidente Repúblika númeru 107/2024, nomeia Embaixadór Francisco Tilman Cepeda ba kargu Embaixadór Reinu Tailândia, assina husi Prezidente Repúblika, José Ramos-Horta, iha loron 15 Outubru 2024.
Jornalista: Hortencio Sanchez
Editór: Florencio Miranda Ximenes
