DILI, 16 outubru 2024 (TATOLI) – Inspetora Autoridade Inspesaun Fiskalizasaun Atividade Ekonómiku Sanitária Alimentár, Institutu Públiku (AIFAESA.IP), Odete da Silva Viegas, hateten AIFAESA halo ona esforsu hodi halo kooperasaun ho laboratóriu BPOM Indonézia atu estabelese laboratóriu nasionál hodi bele kontrola hahan sira ne’ebé mak tama mai Timor-Leste.
“AIFAESA halo ona esforsu hodi halo kooperasaun ho Indonézia atu bele estabelese laboratóriu iha nivel nasionál ne’ebé sai laboratóriu referénsia ba nasaun tomak atu ita bele kontrola ai-han ne’ebé mak tama no mós ai-han ne’ebé mak prodús iha rai laran”, Odete informa iha nia kna’ar fatin AIFAESA Matadoru, ohin.
Nia dehan, Governu halo ona reabilitasaun ba infraestrutura ne’ebé mak iha Tibar, atu laboratóriu BPOM Indonézia bele apoiu fasilidade no kapasitasaun rekursu umanus hodi bele halo teste ai-han sira iha Timor-Leste.
“Ita espera katak Governu nia papel halo akordu ne’ebé mak iha atu halo reabilitasaun ba infraestrutura ne’ebé mak iha, nune’e BPOM Indonézia nian bele apoiu ita liu husi ekipamentu no kapasitasaun rekursu umanus”, nia relata.
Nia haktuir, estruturra foun sei kontinua ho planu ne’ebé mak antes ne’e iha ona, atu bele mellora di’ak liu tan servisu AIFAESA nian ba oin.
“Ami iha hanoin ida katak ida-ne’e sai prioridade ida ne’ebé mak ami estrutura foun sira tama mai atu bele hala’o knaar ida-ne’e klaru tanba ami kontinua ho planu ida ne’ebé mak dijirente sesante sira iha ona no ami kontinua mellora di’ak liután servisu ida-ne’e ba oin”, nia afirma.
Nia informa, orsamentu ne’ebé mak Governu aloka ba halo reabilitasaun ba infraestrutura ne’e hamutuk rihun $250, entaun presiza haree hamutuk oinsá inisia fila fali prosesu ida-ne’e.
“Ita aloka ona orsamentu ba reabilitasuan infraestrutura ne’e hamutuk rihun $250, entaun ita presiza haree hamutuk fali atu nune’e oinsá bele inisia fila fali prosesu ida-ne’e, nune’e ami mós haruka ona karta ba Embaixada Indonézia kona-ba servisu laboratóriu nian, prosesu saida mak bele tuir mai, ita presiza atu haree tanba BoQ ka dezeñu iha ona MOP atu halo reabilitasaun”, nia konklui.
Jornalista : Felicidade Ximenes
Edditór : Zezito Silva
