COVALIMA 16 Outubru 204 (TATOLI) – Sekretaria Estadu ba Asuntu Toponímia no Organizasaun Urbana (SEATOU) seidauk tau arruamentu ka dipozisaun ba naran estrada iha postu administrativu sira, tanba foin halo sensibilizasaun ba Dekretu-lei númeru 29/2016 kona-ba Rejime Jurídiku Toponímia no Numerasaun Polísia ba autoridade sira iha Covalima.
Diretór Nasionál Toponímia, Herminio Moniz Ribeiro, hateten atu organiza munisípiu ho di’ak ba dahuluk presiza iha naran ba arruamentu sira. Atu koloka naran ba estrada sira ne’e, presiza hetan aprovasaun husi Reuniaun Kosellu Koordenasaun Munisipál hodi tau númeru iha uma sira, nune’e sidade bele organizada.
“Ita-nia sidade seidauk organiza ho di’ak tanba iha Timór laran, kapitál munisípu de’it mak foin organiza tau naran arruamentu, maibé seidauk kompleta númeru uma no iha postu sira ita seidauk tau naran”, Herminio Ribeiro dehan iha ámbitu sensibilizasaun, iha salaun administrasaun postu Suai, iha Tabakolot, ohin.
Nia esplika katak arruamentu iha nia tipu haat mak hanesan avenida – espasu urbanu públiku ho dimensaun superiór ka hatudu ezemplu; rua mak espasu urbanu públiku pelu menus mínimu diresaun ida; travesa mak espasu urbanu públiku ne’ebé estabelese ligasaun entre arruamentu rua ka liu; no beku mak dalan públiku ho unika intersesaun ne’ebé bele liga ho dalan seluk.
“Ko’alia kona-ba toponímia , kapitál munisípiu sira iha ona naran arruamentu, presiza tau tan númeru iha uma sira, maibé iha postu sira presiza hahú ho naran arruamentu hafoin tau númeru”, dehan.
Toponímia define ba pontu 13 mak hanesan arruamentu, avenida, rua, travesa, beku, jardín, largu, númeru polísia, tipu toponímia, toponímo, parke, estrada no espasu.
Ministériu Administrasaun Estatál (MAE) rejista ona naran arruamentu husi munisípiu Covalima, iha postu Suai hamutuk 135, kompostu husi naran ba avenida, rua, travesa no beku.
Diretór Servisu Munisipál Obra Públika Covalima, Sidónio Gusmão, dehan sira halo ona koordenasaun ho SEATOU atu haree ba asuntu toponímia no halo jestaun ba estasionamentu sira.
“Obra Públika iha nia subprograma liga ba asuntu toponímia, nune’e ita presiza atu haree no halo mapeamentu naran fatin ne’ebé ita identifika iha postu Tilomar, Suai no Zumalai”, nia salienta.
Prosesu atu halo mapeamentu iha postu administrativu sira ne’e presiza submete proposta husi suku no halo enkontru hafoin aprezenta iha konsellu konsultivu munisipál no kontinua aprezenta ba MAE hodi hetan aprovasaun ba naran sira ne’ebé aprezenta husi komunidade.
Jornalista: Celestina Teles
Editora Maria Auxiliadora
