Grupu negósiu 87 harame feira Festivál Rabilau aprezenta produtu lokál
AINARO, 16 outubru 2024 (TATOLI)–Grupu negósiu hamutuk 87 husi munisípiu sira harame feira Festivál Kulturál Rabilau, ho produtu lokál agríkola ne’ebé kualidade no saudável inklui produtu artezanatu sira.
“Ita iha problema oitoan ho espasu tanba dahuluk ita planu prepara barraka 50, maibé realidade to’o horiseik grupu aumenta to’o 72 no husi Same ne’ebé iha dalan ona hamutuk 15, entaun hamutuk 87,” Vise-Ministru Komérsiu no Indústria, Augusto Junior Trindade, informa ba Agência Tatoli, iha Festival Rabilau, iha foho Rabilau, munisípiu Ainaro, kuarta ne’e.
Tanba ne’e, ekipa husi Ministériu Komérsiu no Indústria (MKI) buka hela espasu nune’e grupu 15 bele tau sira-nia produtu lokál sira hodi bele harame liután atividade ne’e.
“Ami buka hela espasu atu sira to’o mai bele tau sira-nia produtu. Agora ami rejista hela no buka hela meza no kadeira nune’e bele tau produtu. Ita haree komunidade husi munisípiu sira ne’e mai halo rame feira no Festival Kulturál Rabilau ne’e. Ita-boot sira haree komunidade la’o ain mak barak no entusiazmu tebes hodi partisipa, ida-ne’e hatudu entusiazmu ne’e boot,” nia akresenta.
Notísia relevante : Abitante apresia Governu nia inisiativa bele dezenvolve turizmu liuhusi Festivál Rabilau
MKI fó prioridade feira ne’e ba munisípiu Aileu, Ainaro, no Manufahi hodi halo promosaun ba produtu agríkola hanesan kafé, lakeru, batar, no seluk tan.
“Maibé ami la taka dalan ba munisípiu seluk atu voluntáriamente, pur ezemplu ita-nia inan-aman husi munisípiu Viqueque no Lautém, sira mai ho sira-nia rain ho produtu homan. Produtu ne’ebé lori mai ne’e produtu agríkola ita-nia rasik no iha mós indústria tua Kuda-Ulun no iha xokolate no maioria iha feira ne’e produtu agríkola. Iha ne’e mós feira sorghum ne’ebé halo ba sasoro, lakeru diversifika ba bolu, no iha mós gastronomia. Aleinde ne’e batar no kafé ne’ebé fai de’it la’ós uza mákina no iha laran ita bandu han mie instan iha feira ne’e,” governante ne’e informa.
Iha fatin hanesan, Xefe Grupu Kafé Família husi munisípiu Manufahi, Natália da Costa Noronha, dehan, grupu ne’e mai halo promosaun ba produtu kafé no produtu seluk.
“Ohin ha’u lori kafé ho modelu rua mak kafé arabika ho kafé lakuten, ne’ebé ami lori mai iha feira ne’e. Iha mós produtu kamí, kaijus, maek, no nuu-maran. Ami mai ne’e halo promosaun, ema la sosa laiha problema, ita hakarak no presiza promove nune’e ema hatene ita-nia produtu sira. Produtu hirak-ne’e ho nia presu ne’ebé la hanesan, husi $1,50, $2,50 to’o $5,” nia katak.
Natália da Costa dehan, maski dook maibé nafatin kontente tanba bele promove produtu atu nune’e labele depende de’it ba produtu husi rai-li’ur.
“Presiza promove produtu tanba se lae, hatun ema la hatene produtu Manufahi nian. Tanba dala barak ema hanoin kafé ne’e husi munisípiu Ermera nian de’it. Maibé ita Manufahi mós iha produtu kafé, tanba ne’e feira ne’e di’ak tanba grupu produtu sira bele promove maibé problema mak dalan ka estrada tanba horiseik tuir mai susar oituan. Tanba ne’e, oportunidade ne’e hakarak rekomenda Governu liu-liu MKI ne’ebé organiza feira ne’e presiza tau atensaun ba dalan,” nia tenik.
Jornalista : Osória Marques
Editora : Julia Chatarina
