HNGV iha fulan rua rejista bebé mate hamutuk 26
DILI, 16 outubru 2024 (TATOLI) – Diretóra Enfermajen no Pediatria iha Hospitál Nasionál Guido Valadares (HNGV), Maximiana Libania Sagrada Ferrão, hateten HNGV rejista bebé mate hamutuk 26 iha agustu to’o setembru.
“Iha fulan-Agustu no setembru tinan ne’e, bebé moris iha Hospitál Nasionál Guido Valadares hamutuk 1.013, husi ne’e bebé mate hamutuk 26”, Diretóra Enfermajen no Pedatria Maximiana Libania Sagrada Ferrão informa ba jornalista sira iha HNGV, ohin.
Libania dehan, bebé moris mai ho kondisaun mate ne’e tanba dala barak inan sira iha komplikasaun ruma. Totál inan ne’ebé mak mai baixa iha departamentu Maternidade hamutuk 998 no bebé ne’ebé moris hamutuk 1.013, kompostu husi mane hamutuk 539 no feto 474.
“Inan ne’ebé ho partu normál 603, partu sezariana 274, vacum signifika ita ajuda hasai ho alat ne’e hamutuk 114, bebé ne’ebé moris kidun mak uluk ho totál 23”, nia relata.
Nia hateten, bebé sira ne’ebé mak moris mai ho todan menus husi kilograma 500 na’in-ida no bebé ho kilograma 500-900 na’in-haat.
“Liuhusi kilograma 1000-199 ne’e hamutuk 20, depois liuhusi kilograma 1500-2499 ne’e hamutuk 109, liuhusi kilograma 2500 bebé 855 no bebé ne’ebé mak hetan kilograma 4000 ka liuhusi 4 kilograma ne’e hamutuk 18”, nia subliña.
Nia husu ba inan isin rua sira katak tenke hakbesik ba ospitál ka postu saúde ne’ebé mak besik atu bele hetan tratamentu ne’ebé mak di’ak husi profisionál saúde sira.
Jornalista : Felicidade Ximenes
Editór : Zezito Silva
