Iha organizasaun barak ne’ebé mak atu hanesan, ba naran no mós ba sira-nia obra. Hanesan mós ho Millennium Challenge Corporation (MCC) ho Millennium Challenge Account Timor-Leste (MCA-TL). Mezmu naran rua ne’e dalabarak uza troka-malu de’it, sira hala’o papél ne’ebé la hanesan ba promove dezenvolvimentu sustentavel iha Timor-Leste. Habadak deit katak entidade rua ne’e la hanesan.
Millennium Challenge Corporation ka MCC ne’e governu Estadus Unidus nia ajénsia ida ne’ebé mak fornese fundu no matadalan estratéjiku hodi tulun nasaun sira hasoru sira-nia dezafiu dezenvolvimentu ne’ebé boot liu. MCC investe ba kreximentu ekonomia ba tempu naruk liuhosi insiativa ne’ebé dezeña hodi tulun ema sai husik kiak no kria oportunidade ba futuru ida ne’ebé nabilan liu.
Iha Timor-Leste, MCC parseria ho Governu Timor-Leste iha investimentu konjunta ida ba projetu transformative rua ba inisiativa Timor-Leste Compact, ba investimentu konjunta ne’e MCC kontribui millaun $420 no governu Timor-Leste aumenta millaun $64, hamutuk millaun $484. Investimentu ne’e foka ba iha projetu xave rua; Projetu Bee, Saniamentu, ho Drainajen (WSD) no Projetu Edukasaun TALENT (Teaching and Leading the Next Generation of Timorese). MCC nia fundu no vizaun ne’e sai baze ba projetu rua ne’e, loke dalan ba kreximentu no dezenvolvimentu sustentavel iha Timor-Leste.
Enkuantu Millennium Challenge Account (MCA-TL) nu’udar entidade nasionál ida iha Timor-Leste ne’ebé estabelesidu tuir Dekretu Lei númeru 96/2022, iha loron 30 Dezembru, amenda tuir Dekretu Lei númeru 26/2024/ 5 Juñu. MCA-TL ne’e tutela tuir Ministériu Finansa no iha obrigasaun hato’o relatóriu ba Konsellu Diretiva sira. Nune’e, MCC fornese fundu no diresaun estratéjiku, MCA-TL nia mandate mak atu jere no responsabiliza ba ezekuta projetu sira ne’e iha baze.
MCA-TL kolabora ho governu nia entidade oioin, hanesan Bee Timor-Leste no Ministériu Obras Públika ba projetu Bee Saniamentu, ho Drainajen no Ministériu Edukasaun Ensino Superior, Siénsia no Kultura ho Ministériu Edukasaun ba Projetu Edukasaun TALENT. MCA-TL asegura katak kada inisiativa sira ne’e responde direta ba povu Timoroan nia nesesidade no apoia nasaun ne’e nia meta dezenvolvimentu sira. MCA-TL serbisu besik liu ho liña ministériu sira hanesan Ministériu Justisa, Sekretáriu Estadu ba Rai no Propriedade, Ministériu Saúde, Ministériu Administrasaun Estatal, governu Timor-Leste nia ajénsia sira, organizasaun sosiedade sivíl, setór privadu no parseiru dezenvolvimentu sira, ho autoridade lokál, no komunidade hodi tranforma Timoroan nia mehi ba realidade ne’ebé konkretu, foka ba harii Timor-Leste nia sistema saúde públiku iha área hanesan bee-moos, saniamentu, drainajen, no dezenvolvimentu kapasidade profisionál ba edukadór eskola sira no lideransa sira iha eskola sekundáriu públiku sira. Investimentu transformative sira ne’e sei promove ba redusaun kiak liuhosi kreximentu ekonomia.
Kompriende diferensa entre MCC ho MCA-TL ne’e krusiál tebes hodi apresia esforsu kolaborativu ida ne’e. Katak, MCC lori rekursu no peritu internasionál sira, MCA-TL fornese koñesimentu lokál no implementasaun ne’ebé presiza hodi hetan impaktu ba tempu naruk. Hamutuk, organizasaun rua ne’e dedikadu ho kria futuru ida ne’ebé mak nabilan no saudavel liu ba Timor-Leste.
