SERVE,I.P Viqueque arrekada reseita rihun $17 ba kofre Estadu
VIQUEQUE, 16 outubru 2024 (TATOLI)- Koordenadora Servisu Rejistu no Verifikasaun Emprezariál, Institutu Públiku (SERVE,I.P) Sukursál Munisípiu Viqueque, Celestina da Conceição Soares, relata husi Janeiru to’o Setembru, konsege rekolla reseita hamutuk $17,814.00 hodi kontribui ba kofre Estadu.
“Kona-ba rejistu komersiál ne’ebé ami hahú iha Janeiru to’o Setembru tinan 2024 ne’e fó lisensa ba ita-nia empreza sira-ne’ebé hala’o atividade negosiu iha munisípiu Viqueque, nune’e ami konsege rekolla reseita $17,814.00 hatama ba kofre estadu”, Celestina da Conceção Soares, ba TATOLI, iha ninia knaar fatin Beloi, Viqueque Viqueque Vila, kuarta ne’e.
Lisensa komérsiu ne’e Celestina dehan, rejista lisensa foun ba tipu Enin hamutuk 151 ba negosiante ki’ik sira-ne’ebé loke kioske no faan modo, rejistu Unipesoal 47, rejistu Lda ida, renovasaun enin hamutuk 116, renovasaun unipesoal hamutuk 119 no renovasaun Lda hamutuk hitu.
“Aleinde ne’e negosiante balun halo alterasaun ba sira nian atividade balun altera muda fatin, balun aumenta atividade ne’ebé ami rejista tipu enin hamutuk 32, unpesoál iha 66 no Lda iha tolu maka halo alterasaun ba atividade 3”, nia relata.
Reseita ne’ebé SERVE,I.P Viqueque rekolla hanesan iha fulan-Janeiru rekolla $450. Fevereiru $3.040, Marsu rekolla $2,124, Abríl $2,144, Maiu $2,077, Juñu $1,533, Julu $2,094, Agustu $2,469 no Setembru $1,875.
“Uluk ema ladun hatene ami-nia papél, nune’e iha tinan kotuk ami halo rejista movél tama sai postu no halo esplikasaun ba negosiante sira. Tan ne’e iha tinan ida-ne’e ami haree negosiante ki’ik liuliu tipu Enin rejista komesa barak. Ho ida-ne’e ha’u husu ba negosiante sira-ne’ebé seidauk rejista lisensa mai ami-nia fatin hodi hetan lisensa”, nia afirma.
Iha tempu badak, SERVE, I.P sukursál munisípiu Viqueque lansa kona-ba rejistu movél ba negosiante sira iha área rurál ne’ebé hakarak hetan lisensa halo atividade kioske sira.
Jornalista : Vitorino Lopes da Costa
Editór : Florencio Miranda Ximenes
