Empreza ualu husi Japaun hakarak rekruta timoroan
DILI, 17 outubru 2024 (TATOLI) – Empreza ualu husi Nasaun Japaun, ohin, hasoru malu ho Sekretáriu Estadu Formasaun Profisionál no Empregu (SEFOPE) hodi ko’alia kona-ba rekrutamentu ba timoroan sira atu ba servisu iha Japaun.
“Ita boot sira akonpania iha loron 8 fulan-Outubru, ita asina akordu kooperasaun kona-ba Programa Treinamentu Tékniku Internu ida ho Governu Japaun iha Ministériu Negósiu Estranjeiru no Kooperasaun (MNEK), entaun husi akordu ne’e mak horseik empreza ualu ne’ebé mak husi nasaun Japaun mai iha Timor-Leste no ohin hasoru malu ho ami, tanba sira hakarak halo rekrutamentu ba joven sira ba área konstrusaun no infraestrutura nian”, SEFOPE Rogerio Araujo Mendonça informa ba jornalista sira iha edifísiu SEFOPE Caicoli, ohin.
Nai dehan, Japaun sei husu ba Timor-Leste kona-ba timoraon hira mak sei presiza, maibé tenke prepara uluk kondisaun.
“Ha’u hanoin sira presiza na’in hira, númeru, ohin sira la sita, maibé sira ninia rekomendasaun mai ita mak ita tenke prepara kondisaun hanesan ita tenke prepara lingua no prepara adapta sira-nia kultura iha ne’eba hanesan ho Austrália no Koreia nian, banhira ita atu haruka ita-nia joven sira ba maizumenus ita sempre fó mensajen oinsá ita atu ba iha nasaun ida ne’ebé mak ita atu ba tenke adapta tuir ema nia kultura no ema nia moris iha ne’eba”, nia informa.
Nia relata, ema tekniku timoroan barak mak iha esperiénsia kona-ba ida-ne’e hanesan balun eskola iha eskola tékniku vokasionál, balun iha universidade, maibé iha área tékniku no konstrusaun, entaun sira ne’e presiza ba tuir formasaun ba lingua atu bele hetan oportunidade hodi bele ba servisu iha nasaun Japaun.
Iha fatin hanesan, Prezidente Empreza husi Research Institute Of Construction And Economy (RICE), Sasaki Motoi, dehan sorumutuk ho SEFOPE mak ko’alia kona-ba rekrutamentu ba timoroan sira atu ba servisu iha nasaun Japaun.
“Ohin ami empreza sira ne’e mai hasoru Governu Timor-Leste liuliu SEFOPE atu ko’alia kona-ba rekrutamentu ba timoroan sira atu ba servisu iha Japaun, tanba empreza barak iha ne’eba buka traballador ne’ebé mak badinas servisu”, Sasaki Motoi haktuir.
Sasaki Motoi, afirma traballadór ne’ebé mak atu ba servisu presiza hatene lingua nune’e servisu bele la’o ho di’ak.
“Ami-nia objetivu no esperansa boot mak Governu Timor-Leste atu prepara lingua Japaun nian, ida-ne’e mak ami-nia pedidu mai hasoru malu ho SEFOPE, entaun daudaun ne’e ami labele temi ema na’in hira mak atu ba, maibé iha empreza ida idak mak sei presiza atu halo rekrutamentu”, nia konklui.
Jornalista : Felicidade Ximenes
Editór : Zezito Silva
