Laiha diploma, estudante na’in-16 iha Viqueque  la partisipa ezame nasionál

VIQUEQUE, 17 outubru 2024 (TATOLI)-Diretór servisu Edukasaun munisípiu Viqueque, Julio Sakadura, informa, estudante anu letivu 2024 na’in-16 la partisipa ezame nasionál  tanba laiha diploma.

“Ezame nasionál tinan ida-ne’e ita-nia estudante na’in-3.248, maibé prosesu verifikasaun dokumentu propriu hanesan diploma foto kopia  husi eskola ensinu báziku  laiha, entaun  estudante  na’in-16  labele  tuir  iha ezame nasionál”, nia hatente ba Ajénsia TATOLI,I.P iha ninia kna’ar fatin Beloi, Viqueque Vila, kinta ne’e.

Nia esplika estudante ne’ebé partisipa kompostu husi ensinu báziku, sekundáriu no tékniku vokasionál totál na’in-3.232, maibé estudante Tékniku Vokasionál Cristal iha Viqueque -Vila na’in ida  maka moras ne’ebé labele partisipa iha  ezame nasionál.

“Hafoin ezame agora ne’e hotu, hafoin  estudante referida tuir fila ezame. Maibé, ba estudante na’in-16 sei la tuir ezame tanba sira  la priense kritériu ba ezame nasionál liuliu laiha diploma”, nia afirma.

Aleinde ne’e, nia observa durante prosesu ezame nasionál  hahú segunda la’o kinta ne’e la’o di’ak  no laiha impedementu ruma iha eskola  sira iha munisípiu Viqueque.

“ Hafoin ezame hotu mak rekolla hotu pontu ezame mai munisípiu, hodi halo verifikasaun. Depois verifikasaun hotu kontinua transporta pontu ezame ba nasionál hodi halo koresaun”, nia afirma.

Tuir dadús estudante klase 3 husi munisípiu Viqueque ne’ebé partisipa ezame nasionál kompostu husi EBC no EBF hamutuk 1.752, ESG no ESGF  na’in-1.398, ESTV na’in-82, nune’e totál estudante hamutuk 3.232 husi eskola 44 iha munisípiu Viqueque.

Jornalista  :  Vitorino Lopes da Costa

Editór        :  Floréncio Miranda Ximenes