DILI, 17 outubru 2024 (TATOLI)–Parlamentu Nasionál (PN) liuhusi Grupu Nasionál Uniaun Inter Parlamentar (UIP), partisipa konferénsia Uniaun Inter Parlamentar (UIP) ba da-149 ho tema “Ciência, Tecnologia & Inovação: Caminho para a Transformação e Desenvolvimento Sustentável” iha loron 13 to’o 17 fulan-outubru tinan 2024 iha Genebra Suiça.
Prezidente Grupu Nasionál UIP ne’ebé lideradu husi Deputadu, Saul Salvador Amaral, akompañadu husi Vise-Prezidente, Deputada Maria Teresa Gusmão, Sekretaria Deputada Carminda Carlota no membru Deputada Ana bela Savio, no tékniku sira partisipa konferénsia refere.
Tuir nota ne’ebé Agência TATOLI asesu, kinta (17 outubru 2024) ne’e, husi mídia PN ne’e haktuir katak iha reuniaun ne’e tuir ajenda ne’ebé mak iha. Reuniaun dahuluk, delegasaun sira partisipa iha fórum feto Parlamentár, fórum joven Parlamentár, komisaun pás no seguransa internasionál, komisaun direitu umanu, komisaun dezenvolvimentu sustentável no reuniaun assembleia jerál.
Iha reuniaun kooperasaun sira mak hanesan Asia-Pacific Group meeting (APG), Asian Parlamentary Assembly (APA) no Grupo AP-CPLP.
Aleinde ida-ne’e iha mós semináriu g7+ nian iha Genebra, embaixadora konvida membru Deputadu sira partisipa iha semináriu refere.
Fórum feto Parlamentár ko’alia liu kona-ba reparasaun vitima ba violasaun hanesan mosu arma konflitu entre grupu ou nasaun, ne’ebé mak sempre akontese ema halo violasaun seksuál hasoru feto sira no ema oho feto sira.
Aleinde ida-ne’e, labarik sira mós sai vítima no lakon oportunidade ba asesu edukasaun, saúde no infraestrutura bázika, kona-ba dezemvolvimentu sustentável arma konfliktu fó impaktu negativu ba sosiedade sira no labele asesu ba edukasaun, saúde no infraestrutura bázika.
Ida-ne’e, nia hateten, impkatu ida no Timor-Leste laiha dalan atu ko’alia kona-ba dezenvolvimentu sustentável.
Iha parte direitu umanu nian, nia hateten, ko’alia liu kompañia sira ne’ebé mak ba investe iha nasaun barak maibé sira la kontribui selu taxa ba Estadu, ne’e prejudika reseita Estadu nian no Estadu labele investe ba setór ne’ebé mak fundamentál tuir planu Estadu nian.
Iha reuniaun UIP ne’e, tuoir nia, iha mós reuniaun ba asosiasaun sekretáriu Jerál Parlamentu, nune’e sekretáriu jerál Parlamentu Nasionál mós partisipa reuniaun UIP ne’e.
Jornalista : Nelson de Sousa
Editór : Cancio Ximenes
