DILI, 17 outubru 2024 (TATOLI) – Sekretáriu Estadu Formasaun Profisionál no Empregu (SEFOPE) kontinua despede traballadór timoroan 29 ne’ebé sei ba servisu iha área peska no fábrika iha Korea.
Sekretáriu Estadu Formasaun Profisionàl no Empregu (SEFOPE), Rogerio Araujo Mandonça, hateten traballadór timoroan sira ne’ebé mak atu ba servisu iha nasaun Korea, SEFOPE sempre realiza serimónia despedida liuhusi asina deklarasaun.
“Ita-nia traballadór sira ba Korea ka Austrália, ita boot sira hatene katak sira atu sai ita halo serimónia despedida, entaun serimónia despedida ida-ne’e mós ita boot sira hatene halo akordu ho parte Governu ho família no traballadór sira”, Rogerio Araújo Mandonça dehan ba jornalista sira iha edifísiu SEFOPE, ohin.
Nia esplika, akordu ida-ne’e atu kesi traballadór sira balun ne’ebé mak ita boot sira rona dehan sai husi sistema, entaun aban bainrua mak Governu ka iha lei ruma ne’ebé mak husi nasaun Korea ka Austrália, banhira deporta sira mai, ida-ne’e labele fó sala ba Governu ka ema ne’ebé mak lidera instituisaun ida-ne’e, tanba antes ita boot sira sai, ita boot sira presta ona deklarasaun sira ne’ebé mak iha hanesan asina parte família, Governu no traballadór.
Iha fatin hanesan, traballadór Sebastião Santos Leite, sente kontente tanba konsege liu ona prosesu sira ne’e no ohin bele hakat ba serimónia despedida entre Governu Timor-Leste ho família traballadór, liu husi asina nota deklarasaun kompremetidu.
‘’Ami hamutuk 32 maibé ohin na’in-tolu la mai, entaun ami na’in 29 mak asina ona deklarasaun entre Governu no família, entaun ami aranka ba Korea iha tempu badak nia laran”, Leite konklui.
Jornalista : Felicidade Ximenes
Editór : Zezito Silva
