AINARO, 17 outubru 2024 (TATOLI)—Sentru Saúde Maubisse rejista pasiente 45 ne’ebé sofre moras estómagu, iha ámbitu Festivál Kulturál Rabilau 2024, iha foho Rabilau, aldeia Ramori, suku Maubisse Vila, postu administrativu Maubisse, munisípiu Ainaro, ne’ebé realiza durante loron-tolu, hahú loron 16 to’o 18 outubru.
“Ami husi Sentru Saúde Maubisse mak responsável ba atendimentu sokuru dahuluk ba públiku iha Festivál Kulturál Rabilau, ne’ebé hetan apoiu hosi Crus Vermelha Timor-Leste (CVTL). Durante loron-tolu, hahú inísiu to’o ohin loron hamutuk 45 ne’ebé ita atende tanba moras estómagu tanba la han,” Pesoál Saúde, Rotelha Ribeiro, hateten, iha Festivál, kinta ne’e.
Notísia relevante : Reprezentante Malázia konsidera presiza promove Festivál Rabilau iha fatin seluk
Pesoál saúde sira rejista pasiente 24 iha loron dahuluk, ne’ebé husi númeru ne’e, iha pasiente tolu mak presiza halo observasaun no ikus ida mak tenke hetan akompañamentu no observa kondisaun to’o dadeer mak foin fila.
Iha loron daruak, rejista kazu hamutuk 18, no husi númeru ne’e iha na’in-ida mak tau soru tanba ulun moras no oin halai.
“Kazu ne’ebé ita atende barak liu ne’e moras gastitis no diareia tanba hahán. Ba loron ohin nian foin mak rejista ema ida. Ida-ne’e mak ita atende durante ne’e maibé laiha ida mak grave. Kazu hirak ne’e akontese ba idade hahú husi tinan 17 to’o 33 ba leten,” nia informa.
Jornalista : Osória Marques
Editora : Julia Chatarina
