DILI, 18 outubru 2024 (TATOLI)–Prezidente Interinu Autoridade Munisípiu Dili (AMD), Francisco dos Santos, informa AMD sei entrega karreta vaskolante foun ida hodi reforsa servisu jestaun merkadu atu kontrola negosiante sira faan sasán iha espasu públiku.
Nia hateten, AMD sosa karreta ne’e ho montante osan hamutuk besik rihun $50 hodi bele reforsa servisu jestaun merkadu loro-loron nian.
“Loloos iha karreta vaskolante rua maibé osan limitadu, entaun ami sosa ida de’it. AMD sei halo inspesaun ba iha karreta foun ne’e hodi bele hahú serbisu operasaun ba kontrolu vendedór sira iha espasu públiku,” Prezidente Interinu Autoridade Munisípiu Dili (AMD), Francisco dos Santos, hateten ba Agência Tatoli, iha Matadoru.
Iha viatura hamutuk neen (6) ne’ebé AMD utliza ba halo operasaun hodi kontrola vendedór ambulante sira-ne’ebé hala’o atividade negósiu faan sasán iha espasu públiku ne’e, sei iha prosesu reparasaun iha ofisina.
“Karreta sira-ne’e iha prosesu reparasaun iha bengkel. Ita mós iha ona karreta foun ida atu reforsa servisu jestaun merkadu,” nia dehan.
Tanba, nia hateten, negosiante sira-ne’ebé faan iha dalan ninin no trotoar leten fó risku ba sira-nia aan no ema ne’ebé la’o ain, tanba vendedór sira faan iha trotoar sira-ne’e halo ema la’o ain sira la’o fali iha Estrada laran.
Nia hateten, ih negosiante barak mak to’o ohin loron kontinua hala’o atividade faan sasán iha espasu públiku iha Timor Plaza nian ba Pantai Kelapa, tesik mai antigu merkadu Comoro nian, iha Kampung Baru no Rotunda Comoro, Eelemloi no fatin sira seluk tan.
“Iha semana oin ne’e, ita utiliza ona karreta vaskolante, nune’e halo operasaun iha Dili laran liuliu ba vendedór sira-ne’ebé haruka tama ba sira sai fali mai. Ita buka meiu atu organiza sira. Ita fó avizu ba sira-ne’ebé mak faan iha trotoar no estrada ninin,” nia hateten.
Jornalista : Jesuína Xavier
Editór : Cancio Ximenes
