Augusto Barreto: “ha’u konsege halakon ha’u-nia maluk ne’ebé ho kondisaun normál”
AINARO, 18 outubru 2024 (TATOLI)—Iha ámbitu Festivál Kulturál Rabilau ne’ebé realiza iha foho Rabilau, aldeia Ramori, suku Maubisse Vila, postu administrativu Maubisse, munisípiu Ainaro, komunidade sira partisipa harame kompetisaun sa’e ai bua ho prezente iha leten.
Abitante lokál ne’ebé hanesan ema ho defisiente, Augusto Barreto, hateten, sa’e ai bua mós esforsu no mentalidade di’ak mak bele to’o leten tanba komisaun tau olei iha ai bua ne’e.
“Ha’u sente kontente tanba mai partisipa Festivál Rabilau no ohin ha’u bele konsege prémiu ne’ebé iha bua leten, ha’u bele manán, ha’u halakon ha’u-nia maluk sira ne’ebé ho kondisaun di’ak. Ida-ne’e difísil maibé ha’u fiar katak ha’u bele to’o leten,” Augusto Barreto, hato’o iha ámbitu Festa Kulturál Rabilau, munisípiu Ainaro, sesta ne’e.
Nia dehan, maski ho kondisaun defisiénsia, maibé la lakon oportunidade no nafatin hakarak kompete ho maluk ne’ebé ho kondisaun di’ak.
“Hau hanesan difisiente, ha’u labele lakon oportunidade ba ema ne’ebé ho kondisaun di’ak, maski sa’e bua ho esforsu boot tanba bua ne’e iha prezente barak iha leten, pinta ho óleu namdoras maibé ha’u labele lakon oportunidade hodi sa’e to’o iha leten hodi hetan prezente ne’ebé antes komisaun prepara ona,” nia akresenta.
Notísia relevante : Turista Alemaña apresia Festivál Kulturál Rabilau
Komisaun loke kompetisaun sa’e ai bua ne’e livre ba komunidade hotu no la haree ba ema ho difisiente.
“Hau-nia maluk difisiente sira seluk lakon oportunidade di’ak ida-ne’e maibé ha’u ho kondisaun difesente, ha’u nunka lakon oportunidade ba sira no ohin ha’u konsege to’o. Ha’u-nia objetivu hodi hetan osan $100, nomós sasán sira seluk ne’ebé komisaun prepara iha bua nia leten,” nia katak.
Nune’e, nia husu ba komunidade ne’ebé partisipa iha Festivál Rabilau atu harame eventu ne’e tanba nu’udar Festivál Kulturál ba timoroan hotu no sai mós identidade kulturál Timor nian.
“Hau nu’udar Maubisse-oan iha kulturalmente, iha ámbitu Festivál Kulturál, ha’u huu karau dikur, ami fiar katak Na’i Prezidente Repúblika sei tau prioridade no halo boot liu Festivál Rabilau ida-ne’e. Ha’u mós husu ba turista sira ne’ebé mai partisipa iha eventu ne’e atu hadomi ita-nia fatin turístiku Rabilau ida-ne’e no keta soe foer arbiru,” Augusto Barreto, hameno.
Prezente ne’ebé iha ai bua leten mak hanesan osan $100, farda desportu, bola, pasta inklui sasán dadur hanesan tasu no sanan.
Ema ho defisiente, Augusto Barreto, iha oan na’in-rua. Barreto moris hanesan ema agrikultór ida, nune’e osan ne’ebé nia hetan hanesan sorte ida no osan ne’e uza hodi sustenta família uma-laran no hodi han-hemu.
“Ha’u agradese tebes ba Estadu no Governu liuhusi komisaun organizadora ne’ebé realiza jogu sa’e bua ne’e. Aleinde ne’e, rekomenda ba Governu atu kontinua realiza Festivál Kulturál hodi anima komunidade no liuhusi eventu ne’e bele halo dezenvolvimentu turizmu ba rai ida-ne’e,” nia katak.
Jornalista : Osória Marques
Editora : Julia Chatarina
