MAPPF ho CRS kolleta ikan nila iha postu Ossú
VIQUEQUE, 18 outubru 2024 (TATOLI)-Ministru Agrikultura Peska, Pekuária no Floresta (MAPPF), Marcos da Cruz, sesta ne’e, hamutuk paseiru Catholic Relief Service (CRS, sigla englés) kolleta ikan nila, iha aldeia Borala, suku Ossú de Cima, Postu Administrativu Ossú, Munisípiu Viqueque.
Iha serimónia kolleta ne’e, Ministru Marcos da Cruz, hateten, Governu sai sasin ba produsaun ikan ne’ebé komunidade sira haki’ak iha postu Ossú ne’ebé hamutuk ho parseiru dezenvolvimentu CRS implementa programa aquakultura (haki’ak ikan).
“Ohin ha’u haree ita-nia komunidade sira antuasizmu ba rezultadu ikan nila ne’ebé sira haki’ak. Metódu ne’ebé grupu Borala A uza hodi fó han ba ikan ne’e hahán alternativu ne’ebé mai husi Lalar no uza produtu agrikultura hanesan hudi tasak no kulu tasak. Ida-ne’e hatudu katak ita la dependénsia ba hahan ikan nian ne’ebé mai husi fabrikanu”, Marcos da Cruz, hateten ba jornalista sira, hafoin ramata kolleta ikan, iha aldeia Borala, sesta ne’e.
Governante ne’e dehan, metódu ne’ebé CRS hanorin ba Grupu Borala A ne’e sai ezemplu ba aquakultura sira iha timor laran tomak katak haki’ak ikan la’ós dependente ba pelete, maibé iha mós ai-han alternativu seluk maka larfa.
“Ha’u sente ida-ne’e sai hanesan inovasaun. Tanba durante ne’e ita seidauk hatene ba hahan alternativu ba ikan nian. Ba ikan-oan ne’e mai husi ita-nia viveiru ikan oan husi Loi-Hunu mak fornese ba ita-nia agrikultura sira haki’ak”, Ministru ne’e subliña.
Nune’e, Governante ne’e, enkoraja grupu aguakultura sira kontinua badinas haki’ak ikan, karik hasoru difikuldade relata ba hodi apoia grupu sira hodi fó espansaun ba kolam ikan.
Tanba ekipamentu pezadu liuliu eskavatór iha hodi tulun agrikultór kee kolam no loke bee dalan hodi aguakultura sira bele hak’iak ikan. Maibé tenke hato’o proposta liuhusi administradór maka haruka ba ha’u hodi apoiu ekipamentu pezadu”, nia afirma.
Iha fatin hanesan, Jestór CRS, Yanti Pinto, hatutan, durante ne’e agrikultór sira hetan difikuldade ba hahán ikan, nune’e CRS halo ligasaun ho universidade ida husi Amérika hodi fó kapasitasaun ba agrikultór sira kona-bá prodús lalar oan hodi fó han ba ikan.
“Rezultadu produsaun lalar oan ne’e ami haree di’ak tebes no ita-nia grupu sira prátika prodús rasik hodi fó han ba ikan no hetan kualidade ikan. Tanba ikan mós presiza protein ne’ebé di’ak,” nia afirma.
Iha bibn ne’e, Koordenadór Grupu Borala A, Raimundo da Costa, relata, grupu ne’e hahú haki’ak iha tinan 2014 to’o 2024 konsege prodús lalar oan hodi fó han ba ikan.
“Ha’u sente di’ak tanba fó rezultadu ikan barak. Kompara ba tinan uluk rezultadu ikan ladun di’ak tanba difikuldade ba ikan nian hahan. Ba oin ami sei kontinua prodús lalar oan hodi fó haan ikan ne’ebé ami haki’ak”. Nia realsa.
Enkuantu, grupu Borala A ho totál uma ka’in 12 no membru grupu na’in-38 no kolam hamutuk 12 ne’ebé oferese bee husi bee-matan Uai-ulau Ossú.
Jornalista : Vitorino Lopes da Costa
Editór : Florencio Miranda Ximenes
