DILI, 18 outubru 2024 (TATOLI)—Sekretária Estadu Formasaun Profisionál no Empregu (SEFOPE), prevee rihun $500-resin atu konstrui sentru formasaun iha munisípiu Covalima ho Aileu iha proposta Orsamentu Jerál Estadu (OJE) 2025.
Notísia Relevante: Governu submete proposta-lei OJE 2025 biliaun $2,6 ba PN
“Kona-ba atu halo konstrusaun ba sentru formasaun iha Suai (Covalima) no Aileu, ida-ne’e importante tebes. Agora, polítika Governu nian hodi lori formasaun ba to’o iha munisípiu, duké ita-nia joven sira bainhira hakarak partisipa formasaun hotu-hotu tenke tun mai iha kapitál,” Sekretáriu Estadu SEFOPE, Rogério Araújo Mendonça, hateten ba Agência TATOLI, hafoin halo audiénsia públika ba proposta OJE 2025 ho komisaun D trata asuntu Ekonomia no Dezenvolvimentu iha Parlamentu Nasionál (PN), sesta ne’e.
Entaun, nia hateten, polítika ho planu orsamentu ne’ebé aloka ba iha tinan 2025 hodi loké fila-fali sentru formasaun ne’ebé uluk hanesan sentru Tibar, sentru SENAI Bekora, INDIMO, IJT, nia uluk tutela iha SEFOPE.
“Ita presiza nafatin sentru sira-ne’ebé ba iha munisípiu no aban bainrua sira mós sei sai hanesan sentru sira iha Tibar no sentru SENAI Bekora,” nia hateten.
Nune’e, iha planu orsamentu tinan 2025 nian, SEFOPE tau ona iha kapitál dezenvolvimentu rihun $500-resin.
Tuir dokumentu livru proposta-lei OJE 2025 Planu Anuál ba Serbisu no Entidade Setór Públiku Administrativu, SEFOPE iha programa ida kona-ba investimentu no diversifikasaun ekonómika iha nia sub-programa infraestrutura no fasilidade ba formasaun profisionál no empregu ho nia atividade konstrusaun sentru formasaun iha Lakonak Suai-Covalima no atividade konstrusaun sentru formasaun iha suku Seloi Malere, postu administrativu Aileu Villa.
Notísia Relevante: SEFOPE prevee millaun $8.4 finansia programa haat iha OJE 2025
Jornalista : Nelson de Sousa
Editór : Cancio Ximenes
