DILI, 18 outubru 2024 (TATOLI) – Governu Xina liuhusi Embaixada iha Timor–Leste, ohin, oferese komputadór unidade lima ba Ministériu Komérsiu no Indústria (MCI) hodi apoia ba atividade serbisu ministériu nian.
Konselleiru Ekonómiku no Komersiál Zhao Suocheng, hateten komputadór lima ne’e ho marka Lenovo disponibiliza ba MCI ho objetivu atu apoia sira-nia atividade serbisu loroloron nian hodi serbi povu ho di’ak.
“Ami oferese komputador sira ne’e ba MCI ho objetivu atu suporta sira-nia atividade servisu loroloron hodi servi povu Timor–Leste’’, Zhao Suoc heng, informa ba jornalista sira iha edifisiu MCI Mandarin ohin.
Zhao apresia serbisu MCI nian tanba dalan atu diversifika kresimentu ekonómiku iha Timor–Leste ba futuru.
Iha fatin hanesan, Ministériu Komérsiu no Indústria, Filipus Nino Pereira, agradese ba Governu Xina tanba fó apoiu komputadór lima ba MCI tanba uza hodi apoiu ba ketik dokumentu via online hodi aselera prosesu servisu iha MCI.
“Lori Governu Timor–Leste nia naran agradese ba Governu Xina liuhusi ninia Embaixada iha Timor–Leste kona-ba apoiu komputadór lima ba MCI. Ho komputador sira ne’e ami sei uza hodi suporta servisu administrasaun iha MCI via online hodi asegura atendimentu públiku iha Timor–Leste’’, Filipus Nino Pereira dehan.
Nia husu ba funsionáriu tomak iha MCI atu utiliza komputador sira ne’e ho kuidadu atu uza iha tempu naruk nia laran hodi garante efetividade servisu no atende públiku inklui setor privadu iha Timor–Leste.
Jornalista : Felicidade Ximenes
Editór : Zezito Silva
