HABADA husu Governu investe iha rekursu umanu liuhusi formasaun ba PNTL
DILI, 21 outubru (TATOLI)–Organizasaun Naun Governamental (ONG) Hali Ba Dame (HABADA) husu Governu liuliu Ministériu Interior (MI) atu investe iha ekipamentu tekonólojia no rekursu umanu lihusi formasaun ba Polísia Nasionál Timor-Leste (PNTL).
ONG HABADA hato’o ona nia sujestaun ne’e ba iha Komisaun B Parlamentu Nasionál relasiona ho PNTL prevee totál Orsamentu Jerál Estadu (OJE) ba tinan 2025 hamutuk $46,420,430 husi total OJE millaun $2.6.
“Aumenta investimentu iha teknólojia no formasaun hodi prioriza modernizasaun sistema vijilánsia no investigasaun, ho foku espesial ba siber seguransa, uza teknolojia avansadu no software análize dadus. Hametin formasaun kontínua no espesializada iha implementa programa formasaun kontínua ba ajente PNTL sira, ho foku espesífiku ba téknika polisiamentu foun, rezolusaun konflitu no jestaun krize,” Diretór Ezekutivu ONG HABADA, Abel Amaral, liuhusi konferénsia imprensa, iha Comoro.
Tuir nia, dezafiu prinsipál ne’ebe PNTL hasoru mak atu garante fundu sira-ne’e aloka ho efetivu hodi hadi’a seguransa interna, formasaun rekursu umanu no infraestrutura, iha kontestu dezafiu seguransa ne’ebe mosu hanesan krime organizadu no ameasa sibernétika.
Nia dehan, reforsa dezenvolve parseria internasioná sira hodi estabelese kolaborasaun ho forsa seguransa sira hosi nasaun seluk hodi troka koñesimentu, formasaun no rekursu sira, ho objetivu atu hasa’e kapasidade resposta PNTL nian ba krime kompleksu no organizadu sira.
“Futuru PNTL nian depende ba ninia abilidade atu adapta ba ameasa modernu sira, hanesan krime sibernétiku no hadi’a infraestrutura no formasaun ba ninia ofisial sira. Aumentu investimentu iha teknólojia modernu sira, formasaun no parseria ho entidade internasionál sira nu’udar oportunidade sira-ne’ebe bele ajuda hametin seguransa no estabilidade iha Timor-Leste iha tinan hirak oin mai,” nia dehan.
Nia husu atu Governu habelar programa polisiamentu komunitáriu hodi intensifika esforsu atu implementa programa polisiamentu komunitária iha área rural, hodi promove konfiansa entre PNTL no komunidade lokál sira.
Nia sujere atu Governu bele hasa’e finansiamentu ba inkluzaun sosiál hodi dedika rekursu barak liután ba programa nasionál asaun ba violénsia bazeia ba jéneru hodi garante katak PNTL iha ferramenta no formasaun ne’ebe adekuadu hodi rezolve kestaun jéneru ho efetivu.
Jornalista : Jesuína Xavier
Editór : Cancio Ximenes
