Komunidade uma-ka’in 58 iha Ainauain ladauk asesu eletrisidade
VIQUEQUE, 21 outubru 2024 (TATOLI)- Xefe Aldeia Ainauain, suku Uma-Ki’ik, postu Viqueque Vila, munisípiu Viqueque, Siquito Pinto, informa, komunidade aldeia Ainauai hamutuk uma-kain 58 la asesu eletrisidade
“Ami hela ami-nia knua kuaze tinan barak ona, maibé to’o agora ami seidauk asesu ba eletrisidade. Nune’e ami moris iha nakukun laran”, dehan Xefe Aldeia ne’e ba TATOLI, I.P iha postu Viqueque Vila, segunda ne’e.
Nia dehan laiha ahi eletrika difikulta tebes estudante sira atu estuda iha tempu kalan hodi.
“Iha tempu kalan ami-nia oan sira atu estudante tenke sunu lilin no lampra. Aleinde ne’e ami hakarak asesu informasaun ruma liu televisaun mós labele. Ha’u sente ida-ne’e sai hanesan difikuldade ba ami ne’ebé moris iha área rurál”, nia lamenta.
Nune’e nia husu, parte relevante sira tau atensaun ba preokupasaun referidu, nune’e fasilita komunidade sira bele asesu ba naroma iha tempu-kalan.
“Durante ne’e ami-nia preokupa ho hato’o bei-beik ba parte relevante sira, maibé to’o agora seidauk iha resposta ruma. Tan ne’e, ami husu ba Governu se bele iha tinan 2025 dada eletrisidade ba komunidade Ainauai hodi asesu”, nia sujere.
Distánsia husi suku Uma-Ki’ik ba aldeia Ainauai purvolta kilométru lima ne’ebé dook husi suku no komunidade uma-kain 58 ho totál populasaun na’in-200.
Iha fatin ketak, Xefe Aldeia Uma Ki’ik, Claudino Amaral, hateten, kona-ba komunidade suku Uma Ki’ik ne’ebé seiduk asesu ba ahi eletrisidade antes ne’e hato’o ona pedidu ba parte relevante hodi dada eletrisidade ba komunidade sira asesu.
“Ha’u-nia komunidade sira, durante ne’e preokupa ba ahi, maibé foin lalais ha’u hato’o ona proposta ba parte relevante ne’ebé ita hein bainhira mak bele resposta ba komunidade sira-nia preokupasaun sira-ne’e,”nia afirma.
Hatán ba preokupasaun ne’e, Koordenadór Eletrisidade de Timor Leste, Empreza Públiku (EDTL,E.P), Eduardo Sarmento, hateten daudaun ne’e projetu dada eletrisidade ba komunidade aldeia Ainauai husi suku Uma Ki’ik tama hotu ona prosesu aprovisionamentu, maibé rezultadu mak seidauk sai.
“ Daudaun sei iha aprovizionamentu nasionál hodi prosesa konkursu. Bainhira prosesu sira-ne’e hotu sei hahú implementa projetu ne’ebé ita hein prosesu bainhira mak aprovizionamentu sira fó sai rezultadu”,nia afirma.
Tuir dadús EDTL,E.P munisípiu Viqueque rejista totál uma-kain 12.945 asesu ona ba liña eletrisidade.
Jornalista : Vitorino Lopes da Costa
Editór : Florencio Miranda Ximenes
