LIQUIÇA, 21 outubru 2024 (TATOLI) – Sekretáriu Estadu Asuntu Veteranu César da Silva “Merak”, enkoraja joven hotu iha Munisípiu Liquiça atu fó liman ba malu hodi kontribui ba dezenvolvimentu nasaun no valoriza inan-aman sira nia luta ba ukun rasik aan iha tempu pasadu.
“Joven sira, liuliu iha Munisipiu Liquiça ne’e, ha’u mós ema Liquiça, husu ba imi labele ransu malu hodi baku malu, labele sunu ema nia uma, labele oho malu ne’e la di’ak ida, imi tenke buka aprinde katak ita nia nasaun ne’e atu hetan ukun rasik aan liu hosi prosesu naruk, entaun imi tenke valoriza, imi tenka sai fali eroi foun ba dezenvolvimentu,” Merak hateten iha Liquiça, segunda ne’e.
Nune’e, nia husu ba veteranu sira atu eduka didi’ak oan sira, konta istoria luta ba oan sira atu hatene hodi hadook aan hosi krime.
“Husu ba veteranu sira, tenke hanorin no konta ba imi nia oan sira kona-ba prosesu luta ba libertasaun nasionál ne’e, nune’e, imi nia oan sira bele hatene hodi hanoin ba eskola atu kontribui fali ba dezenvolvimentu, atu nune’e bele muda sira nia mentalidade hodi hadook aan husi violénsia, ita nia oan sira presiza ita mak tenke hanorin hela de’it sira,” nia tenik.
Nia dehan tan, “tempu to’o ona atu ema hotu luta ba dezenvolvimentu, maibé keta haluha istoria pasadu tanba ho istoria sira ne’e mak lori Timor-Leste ba hetan ukun rasik-an”.
“Joven sira, estudante sira, imi tenke neon nakloke atu fó valór ba funu nain sira. Maibé ikus-ikus ne’e sunu uma komesa menus ona, tuda malu, baku malu komesa menus ona, liuliu iha Liquiça ne’e, ita tenke kontinua hanesan ne’e ba oin,” Merak hakotu.
Jornalista: Hortencio Sanchez
Editór: Florencio Miranda Ximenes
