OÉ-CUSSE, 21 Outubru 2024 (TATOLI) – Ministériu Ensinu Superiór, Siénsia no Kultura (MESSK) loke ona inskrisaun ba estudante finalista sira iha Rejiaun Administrativa Espesiál Oé-Cusse Ambeno (RAEOA) atu asesu ba Universidade Nasionál Timor Lorosa’e (UNTL) no Institutu Politékniku Betanu (IPB).
Koordenadór Inskrisaun, Agostinho da Costa, informa prosesu rejistu hala’o durante loron lima, hahú 21 to’o 25 Outubru 2024 ne’e, iha salaun Edukasaun Oé-Cusse.
“Ita halo abertura ba inskrisaun ba estudante sira hahú ohin to’o sesta-feira semana ne’e. Inskrisaun ne’e atu fasilita estudante sira asesu ba iha UNTL no IPB ba rejime oportunidade, hakbiit ba família sira-ne’ebé vulneravel, rejime ba veteranu nia oan nomós tinan liu ona 23”, koordenadór ne’e informa iha Oé-Cusse, ohin.
Nia salienta katak kritéria ba inskrisaun, antes ne’e, husi parte MESSK partilla ona liuhusi diseminasaun informasaun ba entidade no estudante sira iha Oé-Cusse. Tanba MESSK serbisu hamutuk ho Konsellu Kombatente Libertasaun Nasionál (CCLN, sigla portugés) atu haree liu ba veteranu nia oan no rejime hakbiit mak husi Ministériu Administrasaun Estatál (MAE) atu koordena ho autoridade komunitária sira no Ministériu Solidariedade Sosiál no Inkluzaun (MSSI).
“Ba estudante sira presiza hasai deklarasaun husi husi xefe suku no parte sosiál mak foin bele rejista iha subrejime hakbiit ne’e”, esplika.
Tanba ne’e, kritéria asesu ba rejime hakbiit nesesita fotokópia kartaun eleitorál ka billete identidade, fixa família, diploma finalista nian kompleta ho deklarasaun husi xefe suku, nomós husi MSSI munisípiu.
Nune’e mós veteranu no mártir nia oan presiza dokumentu hanesan no kompleta ho fixa válidu veteranu nian ka fixa ne’ebé hetan ona rekoñesimentu husi Governu no deklarasaun husi Konsellu Veteranu munisípiu.
“Prosesu inskrisaun ne’e laiha limitasaun, tanba ne’e aberta ba públiku no sé mak hakarak rejista bele, importante mak kumpre kritéria hanesan taka iha pájina ofisiál ministériu. UNTL no IPB mós tau ona iha pájina facebook atu estudante sira bele asesu, kada rejime nia dokumentu tau kedas iha ne’ebá”.
Nia salienta katak bainhira halo ona inskrisaun sei kontinua ba ezame depois sei halo verifikasaun ba pontu sira no rejime hakbiit mak sei halo mós entervista no ikusliu husi Komisaun Asesu ba Ensinu Superiór komposta husi diretór-jerál MESSK, parte UNTL no IPB sei tuur hamutuk mak halo desizaun ba rezultadu ikus hafoin bele publika iha mídia sira.
Notísia relevante: MESSK divulga informasaun ba estudante sira asesu ba UNTL no IPB
Iha fatin hanesan, Xefe Departamentu INFORDEPE no Kurríkulu Ezame Nasionál iha RAEOA, Damião da Costa, ne’ebé reprezenta Servisu Edukasaun Oé-Cusse dehan rezultadu atu pasa ka la’e ne’e depende ba estudante sira, tanba ne’e liuhusi teste no la’ós bolu malu de’it.
“Laiha kompadre, ne’ebé estudante sira tenke estuda maka’as atu hetan oportunidade di’ak ne’e”, nia fó hanoin.
Jornalista: Abílio Elo Nini
Editora: Maria Auxiliadora
