DILI, 21 outubru 2024 (TATOLI) – Fundu Populasaun Nasaun Unidas (UNFPA) hamutuk ho Ministériu Saúde fó formasaun ba profisionál saúde sira husi Hospitál Nasionál Guido Valadares (HNGV) no ospitál rejionál sira sira kona-ba vijilánsia no resposta ba mortalidade materna no perinatál ka Maternal and Perinatal Death Survillance and Response (MPDSR).
“Ohin momentu solok boot tebes mai ha’u hodi partisipa iha abertura ba formasaun atualizasaun ba fasilitadór sira kona-ba vijilánsia no resposta ba mortalidade materna no perinatál (MPDSR) durante loron neen, entaun ho programa MPDSR iha Timor-Leste ida-ne’e reprezenta esforsu koletivu no parseria ho Ministériu Saúde hodi hametin sistema saúde iha rai laran”, Reprezentante UNFPA iha Timor-Leste, Bruce Campbell, informa iha nia diskursu iha Novo Turismo, ohin.
Bruce dehan, dezde 2014 ho estabelesimentu sistema vijilánsia no resposta ba mortalidade materna (MPDSR), kolaborasaun ida-ne’e habelar ona ba munisípiu hotu tanba apoiu hosi Ministériu Saúde, UNFPA, OMS no UNICEF.
“Sistema MPDSR ne’ebé metin mak xave atu hamenus mortalidade inan nian, ida-ne’e permite ita atu halibur informasaun krítiku ba asaun, hodi haburas identifikasaun rutina, notifikasaun oportunu, no revizaun klean ba mate inan nian hodi prevene trajedia sira iha futuru. Ha’u kontente ita-boot sira ne’ebé maka hola parte ona iha komisaun sira MPDSR nian, tantu iha nivel ospitál ka munisípiu. Ha’u hein katak formasaun ida-ne’e sei fó kbiit ba ita-boot sira atu hametin liután komisaun sira-ne’e, liuliu bainhira ita identifika pasu konkretu no asionável tuirmai”, nia afirma.
Iha fatin hanesan, Xefe Departamentu Saúde Materna Infantil, iha MS, Lucia Lay, hateten formasaun MPDSR sei foka ba refreska partisipante sira ho matadalan treinamentu ne’ebé atualizadu.
“Treinamentu MPDSR ne’ebé ami hala’o iha semana ida-ne’e sei foka ba refreska partisipante sira ho matadalan treinamentu ne’ebé atualizadu. Ami hakarak atu fó formasaun ba partisipante sira hosi nivel nasionál no munisípiu sira hodi kria grupu formadór sira nian hodi prepara ba espansaun liután ba ospitál no munisípiu sira seluk”, nia salienta.
Nia agradese ba Gabinete Rejionál no Gabinete País UNFPA nian ba sira-nia apoiu hodi organiza formasaun ida-ne’e no mós ba Governu Austrália nia kontribuisaun sira liuhosi Gabinete Rejionál no Gabinete País UNFPA nian ne’ebé apoia programa MPDSR liuhosi formasaun orientasaun ne’ebé mak iha liu husi monitorizasaun no supervizaun sira.
Jornalista : Felicidade Ximenes
Editór : Zezito Silva
