DILI, 22 outubru 2024 (TATOLI) – Vise Primeiru Ministru no Ministru Koordenadór asuntu Ekonómiku no Ministru Turizmu no Ambiente halo lansamentu ofisiál ba forum investimentu turizmu Timor-Leste nu’udar eventu anuál dahuluk ne’ebé sei realiza iha loron 21-22 fulan-Novembru iha Sentru Konvensaun Dili (CCD), fórum inagurál ida-ne’e ho objetivu atu aprezenta Timor-Leste nia potensiálidade turístika ne’ebé seidauk esplora di’ak hodi atrai tantu investór lokál no internasionál sira.
Eventu ida-ne’e sei halibur parte interesada xave sira hanesan, líder sira husi indústria turizmu nian, investór sira, reprezentante Governu no setór privadu nian hosi rejiaun ASEAN.
Objetivu xave husi forum ida-ne’e mak atu promove oportunidade investimentu, estabelese Timor-Leste nu’udar destinu turizmu foun ida iha rejiaun, esplora parseria públiku-privadu hodi mellora ambiente investimentu no enkoraja prátika turizmu sustentável ba benefísiu longu prazu Timor-Leste nian.
“Liuhusi parseria estratéjiku no prátika investimentu ida responsável, ita sei deskobre potensiál estraordináriu hosi indústria turizmu Timor-Leste nian, hodi kria futuru ida ne’ebé sustentável ba ita-nia nasaun no oferese oportunidade úniku no espesiál ba ita-nia investór lokál no international sira”, Vise Primeiru Ministru no Ministru Koordenadór asuntu Ekonómiku no Ministru Turizmu no Ambiente Francisco Kalbuadi Lay, dehan liuhusi konferénsia imprensa iha Farol, ohin.
Lay dehan, forum investimentu turismu ne’e sei mostra ho atividade oioin, inklui diskursu prinsipál hosi péritu xave indústria turismu nian, diskusaun painél sira kona-ba tendénsia no oportunidade sira setór turizmu nian no sesaun networking hodi fasilita parseria ba investimentu.
Eventu ida-ne’e mós sei partisipa ema hamtuk 300-resin, ho númeru partisipante maioria mai husi emprezáriu no investór nasionál sira, inklui membru Kámara Komérsiu no Indústria Timor-Leste (CCI-TL), Asosiasaun Hotelaria, Operadór Turístiku sira no Asosiasaun sira seluk ne’ebé iha relasaun traballu ho setór turizmu. Aleinde ne’e, parseiru dezenvolvimentu sira no investór potensiál sira hosi nasaun iha rejiaun ASEAN nian.
Tuir nia, fórum ne’e planeia atu transforma sai eventu anuál ida, hodi kontinua promove no fasilita investór potensiál sira atu esplora no dezenvolve oportunidade enorme iha indústria turizmu Timor-Leste nian.
Iha fatin hanesan, reprezentante Korporasaun Finansa Internasionál ka Internasional Finance Corporation (IFC), David Freedman, orgullu hodi koopera ho Governu liuhusi Vise Primeiru Ministru no Ministru Koordenadór Asuntu Ekonómiku no Ministru Turizmu no Ambiente no setór privadu sira, liuliu Kámara Komérsiu no Indústria Timor-Leste (CCI-TL).
“Ami prontu atu koopera no organiza eventu ida-ne’e, entaun IFC nia kna’ar mak atu promove investimentu husi setór privadu sira husi rai laran no mós rai liur, ami haree katak setór turizmu ne’e setór ne’ebé mak boot tebes, entaun ami espera katak liu husi eventu ida-ne’e bele konsege halibur investór sira seluk ne’ebé mak iha interese hodi envolve iha setór turizmu liuhusi ida-ne’e ita bele aselera prosesu dezenvolvimentu setór turizmu iha Timor-Leste”, afirma.
Vise Prezidente CCI-TL, Gali Araujo Soares, dehan ho forum invetsimentu ida-ne’e atu tau hanoin hamutuk hodi hamosu oportunidade foun iha eventu ida-ne’e, tanba eventu ida-ne’e hanesan eventu dahuluk iha Timor-Leste. entaun parte setór privadu hanoin katak sei hetan benefísiu direta no indireta sira.
“Ami sei liga ba Kámara Komérsiu no Indústria iha munisípiu atu mai iha nasionál hodi bele hetan benefísiu iha investimentu ida-ne’e, entaun husi ami nia parte atu kolabora nafatin ho Governu hodi hamutuk ita bele kontribui ekonomia iha ita-nia rain”, Gali revela.
Forum Investimentu Turizmu Timor-Leste 2024 organiza hosi ekipa Vise-Primeiru-Ministru, Ministériu Koordenadór asuntu Ekonómiku, Ministériu Turizmu no Ambiente, Tradeinvest Timor-Leste, Autoridade Nasionál Turizmu no International Finance Corporation (IFC) inklui husi parte Grupu Banku Mundiál.
Jornalista : Felicidade Ximenes
Editór : Zezito Silva