DILI, 22 outubru 2024 (TATOLI)–Ministériu Agrikultura, Peska, Pekuária no Floresta (MAPPF) prevee $25,770,785 iha proposta Orsamentu Jerál Estadu (OJE) 2025 hodi sosa trator boot no tratór kiik (hand tractor) inklui sosa mákina kuda hare no ko’a hare.
Tuir livru proposta OJE 2025, MAPPF prevee $25,770,785 hodi aloka ba saláriu vensimentu $11,756,843, bens no serbisu $7,837,057, transferénsia públika $12,065,122, kapitál menór $395,805.
“Ba kapitál minór nian sei sosa nafatin tratór boot unidade 25 no hand trator unidade 300 no mós sosa mákina kuda hare no ko’a hare nian,” Ministru Agrikultura, Peska, Pekuária no Floresta, Marcos da Cruz, hateten ba jornalista sira hafoin halo audiínsia ho deputadu sira komisaun D ba asuntu dezenvolvimentu no ekonomia, iha Parlamentu nasionál, tersa ne’e.
Iha kategoria beins no servisu ho montante $7,837,057 ne’e, MAPPF utiliza atu sosa fini, adubu, ai-moruk, animál atu fó ba agrikultór sira iha territóriu.
Iha kategoria kapital dezenvolvimentu iha orsamentu millaun $2 hodi selu projetu ne’ebé la’o hela iha 2024 nian ne’ebé sei konklui tarde ba to’o 2025.
“Ita bolu dehan orsamentu ba reapropriasaun. Ita hatene katak projetu ne’ebé atu la’o ne’e iha projetu 37 ne’ebé to’o dezembru seidauk bele hotu. Tanba ne’e, prevee hela orsamentu,” nia dehan.
OJE 2025 ne’e mós MAPPF preve orsamentu ba apoiu agrikultor sira-ne’ebé sei hatama proposta mai ministériu atu verifika no ajuda sira hodi aumenta produsaun iha setór agrikultura, ortikultua, pekuária no peska.
OJE 2025 ne’e, MAPPF sei implementa ba iha programa dezenvolvimentu institusionál, programa agrikultura, ortikultura, kafé no planta industriál no anuál, nomos programa sira hanesan pekuária, veterinária no taknólojia, jestaun sustentável ba rekursu akuatiku no jestaun sustentável ba rekursu florestál.
OJE 2024: MAPPF ezekuta ona 64%
Entretantu, Ministru Agrikultura, Peska, Pekuária no Floresta (MAPPF), Marcos da Cruz, informa ministériu ezekuta ona Orsamentu Jerál Estadu (OJE) 2024 nian hamutuk 64% husi totál orsamentu $30. 694.05.00.
“Ohin, ami mai aprezenta ba deputadu sira kona-ba ezekusaun OJE 2024 nian no mos OJE 2025. Ezekusaun 2024 nian ne’e iha 64% ho nia free balance 15%,” Ministro Agrikultura, Peska, Pekuaria no Floresta (MAPPF), Marcos da Cruz, hateten.
Governante ne’e garante, sei halo esforsu fulan tolu ikus ne’e atu bele ezekuta OJE 2024 ho di’ak to’o iha dezembru nia rohan.
Iha ezekusaun OJE 2024 nian ne’e, ministeriu sosa fini hare, batar, adubu organiku no iha kapital menor sosa trator bo’ot unidade 25 no trator ki’ik unidade 400 ne’ebé distribuisaun la’o hela ba munisipiu sira no halo manutensaun ba tratór sira iha 300 ne’e hanesan sosa pesa no batria.
Iha kapital dezenvolvimentu iha liña ministeriál sira hamtuk iha projetu 37 ne’ebé atu besik hotu ona no balun sei presiza tan tempu.
Iha ezekusaun transparensia públika ne’e mak sei kiik, tanba ne’e tenke verifika didi’ak ba grupu sira-ne’ebé aprezenta proposta tuir lei.
“Iha rekezitu lei ida ne’ebé fó 40% depois mak fó tan 60% no tenkefó grupu ne’ebé ema na’in rua-tolu no iha konta bankária. Prosesu sira-ne’e mos halo atraza oituan no halo ezekusaun sei ki’ik. Ami iha hotu ona dadus no avalisaun. Iha area pekuária iha 300 proposta. Liu 60% mak hetan aprovasaun,” nia hateten.
Jornalista : Jesuína Xavier
Editór : Cancio Ximenes
