DILI, 23 outubru 2024 (TATOLI)—Ministériu Obra Públika (MOP) iha proposta Orsamentu Jerál Estadu (OJE) 2025 prevee $270,757,350, hodi kontinua implementa projetu infraestrutura700-resin hanesan estrada, ponte, eletrisidade no seluk tan.
“Ba tinan oin, planu Ministériu Obra Públika (MOP) imi hatene ona, la halo buat seluk halo mak estrada, haree mak bee. Projetu balun la’o hela, ne’e ita tau nafatin orsamentu. Ba iha fundu infraestrutura mak orsamentu ba iha projetu foun, maibé ba estrada rurál sira ba tinan oin ita la tau projetu foun, tanba iha tinan ne’e ita halo konkursu públiku de’it. Depois tinan mak sira bele ezekuta ne’ebé ita kontinua tau orsamentu. Ne’ebé, projetu loos kuaze besik projetu 700-itál ne’ebé la’o hela, barak liu ne’e iha ponte, estrada,” Ministru Obra Públika (MOP), Samuel Marçal, hateten ba jornalista sira hafoin hala’o audiénsia públika ba proposta OJE 2025 ministériu nian ho komisaun E trata asuntu Infraestrutura iha Parlamentu Nasionál (PN), kuarta ne’e.
Durante audiénsia, Ministériu Obra Públika hato’o mós ezekusaun OJE 2024 ne’ebé ein-jerál atinje 82% no espera katak antes fin do ano bele ezekuta aumenta.
Proposta OJE 2025 MOP nian aloka ba saláriu vensimentu $9,182,148, bens no serbisu $19,032,404, transferénsia públika $176,500,000, kapitál dezenvolvimentu $66,042,798.
Prezidente Komisaun E, Marcos Xavier, hateten ohin komisaun hala’o audiénsia ho MOP haree liu ba orsamentu ministériu nian ne’ebé iha tinan 2024, ne’ebé sira iha $224,269,362 ho sira-nia ezekusaun di’ak iha kategória bens no serbisu, saláriu vensimentu, kapitál menór no kapitál dezenvolvimentu sira-nia ezekusaun to’o dezembru bele atinje 80-90%.
“Depois iha proposta OJE 2025, sira aumenta osan ne’e sa’e tiha ba millaun $260-resin, ne’e tanba sira aposta makaas tan iha kapitál dezenvolvimentu, projetu balun la’o hela no laiha projetu foun no balun sira hala’o hela konkursu públiku ne’e mak osan ne’e sira aumenta tan uitoan, tanba iha mós adisionál ba obra sira ne’e. Maibé, millaun $260-resin ne’e fahe tiha ba iha transferénsia públika ba fali EDTL, E.P ho BTL, E.P besik millaun $160 ne’e ba iha empreza rua ne’e,” nia hateten.
Durante audiénsia komisaun rekomenda ba MOP atu haree mós projetu emerjénsia sira-ne’ebé fó tiha ona kompañia hala’o iha balun finaliza no balun seidauk, nune’e atu aselera molok to’o fin dezembru 2024 tenke finaliza ona.
Jornalista : Nelson de Sousa
Editór : Cancio Ximenes
