OJE 2025: MACLN prevee millaun $207 selu veteranu rejistadu 2009
DILI, 23 outubru 2024 (TATOLI)—Ministériu Asuntu Kombatente Libertasaun Nasionál (MACLN, sigla portugés) prevee $207,069,136 iha proposta Orsamentu Jerál Estadu (OJE) 2025, hodi kontinua programa pensaun ba veteranu no selu ka halo pagamentu ba veteranu rejistadu iha tinan 2009.
Notísia Relevante: Governu sei finaliza validasaun dadus veteranu rejistadu 2009 iha tinan ne’e
“Ba 2025 orsamentu prevee millaun $207, hodi selu pensaun veteranu inklui ona rejistu sira 2009 nian, tanba ein-prinsípiu estatutu kombatente ko’alia iha ne’eba lei ne’e prodús efeitu iha janeiru 2025. Entaun, janeiru 2025 ami anúnsia sai lista ba públiku para hodi halo reklamasaun, balun reklama sae no balun reklama sai, ida-ne’e mak regra reklamasaun,” Ministru Gil da Costa Oan Soro hateten ba jornalista sira hafoin halo audiénsia proposta OJE 2025 ministériu nian ho komisaun F trata asuntu Saude, Igualidade Jéneru no Inkluzaun Sosiál iha Parlamentu Nasionál (PN), iha edifisu eis Ministeriu Finansa iha Palasiu Governu, kuarta ne’e.
Nune’e, nia dehan, reklamasaun ne’e fó tempu fulan rua hodi sira bele hatama mai no MACLN prepara definitivu ona hodi halo pagamentu.
Durante audiénsia, MACLN aprezenta ezekusaun OJE 2024 ho montante millaun $113 no nia ezekusaun atinje ona 82% hodi ezekuta maiória ba pensaun veteranu.
OJE 2025, MACLN prevee $207,069,136 hodi aloka ba saláriu vensimentu $1,787,636, bens no serbisu $5,949,982, transferénsia públika $195,515,922, kapitál menór $76,000, kapitál dezenvolvimentu $3,739,596.
Jornalista : Nelson de Sousa
Editór : Cancio Ximenes
