OÉ-CUSSE, 23 Outubru 2024 (TATOLI) – Komandu Polísia Nasionál Timor-Leste (PNTL) Rejiaun Administrativa Espesiál Oé-Cusse Ambeno (RAEOA) preparadu atu asegura loron finadu ne’ebé sei akontese iha 02 Novembru.
“Ne’e la’ós buat foun, maibé finadu kada tinan ita tenke selebra, entaun orientasaun husi Komandu Jerál PNTL, ami iha Oé-Cusse mós halo preparasaun atu asegura ita-nia loron matebian ka loron finadu ne’ebé sei akontese iha semana oin”, Komandante PNTL Oé-Cusse, Superintendente Polísia, Nicolau Francelino da Costa, dehan ba Tatoli, ohin.
Nia informa katak PNTL no F-FDTL sei hala’o enkontru iha semana ne’e atu fahe tarefa serbisu, tanba ema hotu hakarak selebra loron matebian ho pás no hakmatek.
Notísia relevante: Festivál Fronteira la’o iha ambiente seguru – PNTL
“Importante komunidade sira seguru iha loron ne’e, tanba atu kari ai-funan hanoin hikas ita-nia matebian sira. Husi komandu PNTL sei koordena mós ho F-FDTL destakadu sira atu oinsá bele asegura, fahe tarefa serbisu, nune’e loron finadu ne’e bele la’o ho di’ak”, nia garante.
Dirijente PNTL Oé-Cusse ne’e apela ba sidadaun hotu iha Oé-Cusse, liuliu joven sira atu hamutuk hametin estabilidade, nune’e labele hamosu perturbasaun kontra orden públika durante loron finadu.
Nune’e, nia espera katak ema hotu kumpre nafatin dever ho misaun atu reza, sunu lilin ba matebian sira no fó nafatin omenajen ba sira.
“Ami sei koordena ho F-FDTL atu fahe tarefa tenke identifika semitériu sira-ne’ebé sai hanesan risku ba problema, maibé ita-bele dehan ein jerál ha’u fiar katak Oé-Cusse la akontese buat ruma, mezmu kazu ki’ikoan maibé la fó impaktu boot ba seguransa iha Oé-Cusse. Tanba ita-nia dever no misaun mak husu matak-malirin no reza ba ita-nia matebian sira”, nia hakotu.
Loron ba matebian ka finadu mak data ida ne’ebé igreja Katólika dedika ba ema sira ne’ebé mate no ba nia klamar sira.
Jornalista: Abílio Elo Nini
Editora: Maria Auxiliadora
