DILI, 23 outubru 2024 (TATOLI) – Ministra Saúde Elia dos Reis Amaral, hateten Ministériu Saúde prevee millaun $73 iha Proposta Orsamentu Jerál Estadu (OJE) 2025 ba kategoria lima.
“Ami ohin mai hamutuk ho Komisaun F Parlamentu Nasionál ne’ebé trata asuntu saúde, seguransa sosiál no igualdade jéneru hodi aprezenta ezekusaun OJE 2024 no aprezenta proposta OJE 2025 nian”, Elia dos Reis informa ba jornalista sira, ohin.
Elia dehan, Ministériu Saúde prevee millaun $73 hodi aloka ba kategoria lima hanesan saláriu vensimentu, bens servisu, kapitál menór, kapitál dezenvolviemntu no transferénsia públika.
“Saláriu vensimentu ita define iha ne’eba hamutuk millaun $37, bens servisu, ita iha millaun $13-resin, transferénsia públika, ita iha millaun $20-resin, kapitál dezenvolvimentu, ita iha millaun $1-resin, kapitál menór iha millaun $1”, nia esplika.
Nia afirma, MS prevee orsamentu ida-ne’e tanba hareee ba problema saúde iha Timor-Leste, partikularmente ba pasiente sira ne’ebé mak halo hela tratamentu iha rai liur.
“Ita haree ba saláriu vensimentu, ita boot sira hatene ita atu selu pesoál sira ne’ebé mak integra iha Ministériu Saúde, bens servisu atu haree ba ekipamentu, transporte sira hodi reforsa servisu MS nian, transferénsia publika ne’e atu kontinua selu ba pasiente sira ne’ebé mak halo taratmentu iha rai liur no mós selu ba brigada médika Kuba, apoiu Klínika Bairo Pite, Klibur Domin, inklui tiket aviaun pasiente sira ba rai liur, kustu operasionál, kustu aprovizionamentu no apoiu ba nutrisaun”, nia relata.
Rekorda katak ezekuzasaun OJE 2024, Ministériu Saúde ezekuta ona 64%, husi kategroia lima ne’ebé mak iha, hanesan saláriu vensimentu, bens servisu, kapitál menór, kapitál dezenvolvimentu no transferénsia públika.
“Ezekuasaun 2024 ne’e ami foti husi janeiru to’o 1 fulan-Outubru, entaun orsamentu ne’ebé mak sei iha ne’e millaun $21-resin, entaun ita garante katak fim do ano ita bele ezekuta ho di’ak”, nia konklui.
Jornallsita : Felicidade Ximenes
Editór : Zezito Silva
