COVALIMA, 23 Outubru 2024 (TATOLI) – Diresaun-Jerál Servisu Korporativu, Sekretaria Estadu Formasaun Profisionál no Empregu (SEFOPE) organiza semináriu ho tema “Liuhusi papél SEFOPE promove feto, halakon violénsia no asédiu iha mundu traballu”.
Diretór-Jerál Servisu Korporativu, Nélson Soares, dehan semináriu ne’e atu partilla informasaun kona-ba serbisu SEFOPE nian ne’ebé envolve feto sira, nune’e bele iha koñesimentu.
“Ami fahe informasaun liga ho servisu SEFOPE ba feto sira, nune’e bele iha koñesimentu kona-ba grupu autoempregu no formasaun sira. Ita presiza feto sira partisipa másima, nune’e sira asesu ba merkadu traballu”, Nélson Soares dehan iha salaun CNE, iha Tabakolot, ohin.
Iha atividade ne’e, SEFOPE fahe informasaun kona-ba partisipasaun feto serbisu iha rai-li’ur, partisipasaun feto ho difisensia iha dezenvolvimentu, asaun sira hasoru violénsia bazeia ba jéneru liuhusi konvensaun halakon diskriminasaun no asédiu iha mundu traballu.
Tuir observasaun SEFOPE, feto sira ladún envolve iha grupu autoempregu no dalaruma mós sira la asesu informasaun kona-ba asuntu autoempregu, tanba ne’e ho semináriu referidu bele fahe informasaun, nune’e iha tinan oin bele aumenta númeru feto envolve iha autoempregu, tanba daudaun envolvimentu feto iha ida ka rua de’it.
Nune’e, Nélson Soares alerta ba feto sira atu hakbesik aan ba SEFOPE, nune’e bele asesu informasaun hodi bele envolve iha programa SEFOPE nian.
Antónia de Jesus ne’ebé partisipa iha semináriu ne’e hateten feto presiza envolve iha atividade ne’e hodi rona informasaun kona-ba programa SEFOPE nian, liuliu ba feto sira.
“SEFOPE presiza konvidade feto potensiál, nune’e bele asesu informasaun kona-ba programa atu labele lakon oportunidade hodi compete, maibé bele hetan serbisu liuhusi programa SEFOPE”, nia dehan.
Jornalista: Celestina Teles
Editora: Maria Auxiliadora
