DILI, 24 outubru 2024 (TATOLI) – Autoridade Aduaneira hamutuk ho setór privadu no públiku halo diskusaun aberta kona-ba liberasaun merkadoria iha Portu Tibar.
“Ohin ita hamutuk iha ne’e halo diskusaun aberta kona-ba dezafiu no problema sira ne’ebé mak ita haosru lorloron iha Portu Tibar, entaun objetivu prinsipál husi diskusaun aberta ohin loron nian mak dizemina informasaun relasiona papel Autoridade Aduaneira nian partikularmente prosesu deskargamentu merkadoria iha Tibar”, Komisáriu Autoridade Aduaneira Alfandega Joanico Pinto, informa iha nia diskursu iha salaun Ministériu Finansa Aitarak Laran, ohin.
Pinto dehan, diskusaun ne’e atu rona mós preokupasaun no sujestaun no desafiu sira ne’ebé mak ita boot sira hetan liga ba atendimentu Alfandega nian.
“Ami mós hakarak rona ita boot sira-nia preokupasaun no sujestaun no dezafiu sira ne’ebé mak ita boot sira hetan liga ba ami-nia atendimentu nune’e informasaun no preokupasaun sira ne’e hotu bele ajuda ami atu formula polítika reforma ida di’ak liu ba ita-nia servisu autoridade auduneira nian”, nia relata.
Nia afirma, nu’udar komisáriu foun ba Autoridade Aduaneira nian hakarak transforma Autoridade Aduaneira ne’e sai profisionál no kualidade nune’e bele hetan onra no previlenziu husi Estadu ida-ne’e nia matan tanba ne’e atu atinje vizaun ida-ne’e laos de’it atu rona husi termu alfandega nian, maibé presiza tebes atu rona husi ita boot sira hanesan ema ne’ebé mak alfandega prestas servisu ba hodi nune’e bele tulun no dezenvolve polítika reforma ida diak liu no ajuda tulun dezenvolvimentu nasaun nian.
“Liu husi forum diskusaun sira ne’e ha’u espera ambiente sira ne’e di’ak liután ba oin mak odamatan Autoridade Aduaneira nian sei nakloke ba ita boot sira atu simu krítika no hanorin atu nune’e instituisaun ne’e hadia di’ak liutan”, nia haktuir.
Iha fatin hanesan, Prezidente Kamara Komérsiu no Indústria Timor-Leste (CCI-TL), Helder Viera, dehan empreza sira mai hamutuk iha ne’e atu halo diskusaun aberta ho Autroidade Aduaneira kona-ba liberasaun merkadoria iha Portu Tibar.
“Ami sente lei alfandega durante parte balun di’ak no parte balun la di’ak tanba dalabarak ami importa kareta mai tuir prosesu kleur, entaun ho diskusaun ida ne’e bele hadia sistema sira ne’e bele lao ho di’ak”, Helder Viera dehan.
Empreza Pasífika Ajénsia Lda, Jerente Teofilo Antonio Maia, sente kontente tanba alfandega ho timor port bele loke diskusaun aberta kona-ba liberasaun merkadoria iha Portu Tibar.
“Ami nu’udar liman ain ba importadór sente kontente tanba ohin bele halo avaliasaun nune’e bele muda alfandega sira-nia servisu iha futuru liu liu ba importasaun no esportasaun nian”, Teofilo Antonio Maia konklui.
Jornalista : Felicidade Ximenes
Editór : Zezito Silva
